I-DAY FOOTBALL : NAKTUKAH ENGKIM A CHIANG DAWN

Great Sports Independence Day Football Tournament khelh mekah naktuk hian Lammualah inkhel pahnih a awm dawn a, team palite tan inkhel pawimawh vawrtawp a ni ang.

Chhun dar 12:15 ah Dinthar FC leh AIFF U-19 te an inhmachhawn ang a, chawhnu dar 2:30 ah Ramhlun North FC in Bethlehem Vengthlang FC an hmachhawn bawk ang.

Group A – a ngaihnawm !

I-Day tournament tan hma khan Group B kha ‘Group of Death’ ni tura beisei zawk ni mahse Chhinga Veng FC leh Chanmari FC te’n harsatna em em tawk lo in semi-final an inpetkai a, Group A-ah erawh team pali in hmunruak pakhat an la inchuh mek.

Group A atanga semi-final lut hmasa ber champion lai Aizawl FC hian an vawi li khelhah tum hnih chakin vawikhat an tlawm a, draw vawikhat an nei bawk. Heng inkhelah te hian goal 5 thunin an lamah goal 3 a lut a, an goal thun panga zinga pathum hi an defender Kareem-a thun a ni.

Ramhlun North FC in khelh thumah point 4 an hmu tawh a, goal 6 thunin goal 3 an chhuah thung. Inkhel hmasa zawkah Dinthar FC leh AIFF U-19 te an in draw a nih hlauh chuan nikum finalist hian a thiam pali zinga tel turin point khat bak an mamawh tawh lo ang.

Bethlehem Vengthlang FC in Ramhlun North FC ang bawkin khelh thumah point 4 an hmu a, an khingpuite lamah goal 3 thunin goal 2 an chhuah thung. Semi-final luh an duh a nih chuan an chak ngei ngei a ngai ang.

Dinthar FC hian khelh thumah point 3 an hmu tawh a, semi-final luh an duh a nih chuan game thum atanga an point hmuh zat hi game khatah an hmuh a ngaih bakah midang inkhel result a zirin tla thei an ni. 2014 champion hian an khingpuite lamah goal 3 thun tawhin goal 5 an chhuah.

AIFF U-19 te hi Group A-a chak loh la nei lo awmchhun an nih rualin chak la nei miah lo an ni bawk. An khingpuite lamah goal hnih thunin goal hnih bawk an chhuah a, an goal thunte hi DSK Shivajians atanga an hawh Lalawmpuia thun ve ve a ni. Naktuk hian chak ni hmel hmu mahse midang result a zirin mutbu tel thei dinhmunah an ding a, football hian vanneihna a ken tel fo avang erawh chuan an theihtawp an chhuah a rinawm.

Group A inkhel result khaikhawmna :

28 July :

Aizawl FC 2-1 BVT FC
Lalrinzuala 18’ Kareem 58’ – B.Zoramthara 28’ (pen)
RNFC 4-1 Dinthar FC ( C.Ramdinmawia 41(p) Lalliansanga 45’ Francis Onyeama 84’ 91’ – Samuel Laltlanthanga 78’)

31 July : 

BVT FC 1-0 Dinthar FC (B.Zoramthara 67’)
AIFF U-19 0-0 AFC

2 August :

RNFC 1-1 AIFF U-19 (Lalliansanga 1’ – Lalawmpuia 78’)
Dinthar FC 2-1 Aizawl FC ( Lalbiakhlua 27’ Lalnunsanga 92’ – Kareem 16’)

4 August : 

Aizawl FC 2-1 RNFC (Rochharzela 20’ Kareem 59’(pen) – Lalliansanga 64’)
BVT FC 1-1 AIFF U-19 ( Vanlalthanga 48’ – Lalawmpuia 56’)

(Pic : MFA)

Posted in Tualchhung.

Leave a Reply

Or