I-Day tournament a boruak nei lian ber Aizawl Football Club (AFC) in vawiin tlai dar 3 ah 3rd Bn MAP an hmachhawn dawn a, football tuimite tan chuan hmaih phal chi a ni lovang.

AFC rawn in din thar leh hian nasat takin Mizoram Football a nghawng ngawng nghal a, AFC thar hi thla hmasa lawk a din ni mahse Fans ngah ber anga ngaih theih anni nghal a, Mizoram a players tha lak theih apiang la in team tha takah an insiam nghal a. Hetia Mizoram a players tha an lak avang hian MFA pawn tournament ti hlawhtling thei tura ngaiin I-Day tournament ah hian a tel tir a, a tisual lo hle ah a ngaih theih. A chhan chu he Team vang hian nasa zawkin Mizoram Football in ngaihven a hlawh phah a, kalphung thar nei team rawn awm hi Football tan hmasawnna a ni.

AFC hi team tha anni!

Mizoram Striker tha ber zinga mi tam takin an ngaih Ari Benjamin-a Coach na hnuaiah AFC hian tun tournament ah hian beiseina sak tak an nei a.  Defence lamah an player tha Zonunmawia inhliam mahse an la lungngai chuang lova. Durtlang Champion puitu leh Red Ribbon 2011 a Best Player MS-a chu Captain ah an ruat a. MS-a hi ball thiam tak mai a ni a, a khel hi football tui vak lo tan pawh hmuhnawm tham a ni. Chutihrualin MS-a tluk zeta (ai maha) ball thiam David-a (Papuia) an la nei bawk a. Midfield vela ball an han khawih vel tur chu entu te mit chu an ti tlei ngei ang le. Papuia hi Nike Cup Manchester United ah Man Utd lamah a petgoal tawh a, Nike in Indian Footballer  an Sponsored hmasa ber te zing ami a ni. Heta tang ringawt pawh hian a thiam dan tur chu kan hre thei deuh mai awm e.

Anni pahnih bakah hian players tha an kawl nual a, Squad ah mi 30 lai an awm avangin vawiin hian players tha tak tak te kan hmu kim thei dawn lova, mahse Zirtea leh Rammawia te chu hmu turah i lo in beisei phawt teh ang.

Acid Test: 3rd Bn MAP hi Acid chu nise ‘tui pawlh dalh loh’ anni ngei ang!

Mizoram lama Football tuichilh tam tak chuan 3rd Bn MAP hi an tha zawkah an dah a rinawm, a chhan chu team in din na rei tawh annih bakah players an nei tha bawk a. Team ti chak turin civil mi Lalnuna leh Hruaia te an lak belh bawk a, team beiseiawm tak anni.

Lalhruaitluanga te hi an rinrawl tur chu a ni!

Mizoram defender tha Hruaia (Durtlang) hi team inghahna tham a ni a.  Hruaia (Tuikual ‘N’) pawh hi team chakna thuruk a ni bawk a, Hruaia hi winger ball thiam tak mai niin 2nd Div Season Ending Football tournament ah khan Best Player a ni.

Lawma a inhliam!

Subroto Champion team ah pawh tel tawh leh tawh hriat ngah tak, Mizoram Left Wing Back tha ber zinga ami Lawm-a (Chaltlang) a khel thei lo maithei a, mahse Ropuia, JS-a leh Hruaia te an awm chhung chuan defence lam chu a ngaihtuah awmloh.

Vanlafela hi chu a Pa Tiap Tiap a nia!

2004 Inter Village Final a Republic Veng tana khupna chunga Hattrick siam thei, Vanlalfela a fit leh tawh a. Hei hi team dang tan chuan thu lawmawm lo tak a ni. A vanglai a tluk phak rinawm tawh lo mahse a la hlauawm viau a rinawm, chutihrualin Senior Player Rinkhuma inhliam vangin a khel thei dawn lova. Mahse Roliantluanga (RLT-a) a la awm tho avangin attacking chu a na hle turah ngai ang.

Pool khatah pali an awm a, pakhat chauh tlang tur anih avangin eng game pawh hi a hmuhnawm dawn a. Chutiang game hmuhnawm bikah pawh he game chu a special bik dawn. En theuh i tum ang u.