Group A hi an tha tih zep rual a ni lova, Aizawl Football Club (AFC) ball thiam zia te, 1st MAP Academy fit zia te, 3rd MAP that zia te leh Luangmual F.C in theihna an ngah zia te chu kan hmu tawh a. Mahse an thiam ber emaw a tha ber khan Shillong Lajong an tum dawn lova, point hmusang ber chauh in an tum dawn avangin Matchday 3 hi a hmuhnawm ngei ang le. Draw game khelh a thiang tawh loh avangin Attacking Football enturin Lammual i pan khawm ang.

Luangmual F.C. (LFC) Vs Aizawl F.C. (AFC) (1:00 PM)
AFC hian Luangmual hi an hneh theih chuan an ke leh lamin Semi Final a va rap kan ti thei ang. Chutihrualin 1st Bn MAP Academy draw thei Luangmual in an tan draw a pawi tawh tih hre rengin AFC hneh an tum dawn a ni. Hetiang chin tawh ah hi chuan player te inelna mai a ni tawh lova, Coach te inelna a ni tawh zawk e.

Ari Vs Lalnau-a !!!
Ari Benjamin hi player angin chungnung zawk mahse Coach anih tawh chuan hriatthiam a har hle. Ari hian players thlan tur a ngah avangin a dinhmun hi a awhawm kan ti maithei mahse benchwarmer te tih lungngawi tel a ngaih dawn avangin AFC enkawl hi hna hahthlak tak a ni ngei ang le. Chutihrualin helamah kher hi chuan Lalnaua’n buaina a nei tlat lo. Engpawhchunise Coach ah kher hi chuan eng team mahin advantage an nei lo niin a lang.

Best Player Vs Best Player
Tun tournament a ball la khawih mawi ber anga ngaih theih Emes hi Red Ribbon 2011 Best Player a ni a, chutihrualin Penalty atanga pet goal hmasa ber tu BT-a hi Red Ribbon 2010 Best Player a ni ve leh bawk. AFC Captain Emes hi game hmasa zawkah a khel tha takzet a, chutihrualin BT-a erawh beisei a pha lo hle. Mahse veng lama Electric Veng innghahna BT-a hian theihna a ngah avangin en liam mai chu a harsa khawp ang le.

Tunge chak ang le?
AFC Game a mawi em em a, mahse chakpui na tham game a ni em tih erawh hriatthiam a har, 3rd MAP 10 annih hnu chauhva goal thun annih avangin dah sang an la har a, chutihrualin Luangmual game ai chuan a sang zawk in a lang bawk si. Mahse Luangmual in dead ball specialist Malsawma an neih miau avangin AFC chak chiang tura dah erawh a fuh kher lo maithei. Mahse AFC chu chak zawk turah i han dah phawt mai teh ang.

1st MAP Academy Vs 3rd MAP (3:00 pm)
3rd MAP in AFC an hnehloh avangin 1st MAP Academy an hneh ngei ngei a ngai tawh a, chutiang bawkin Academy lam pawh dinhmun him lama an awm duh chuan an chak a ngai thung. Chuvang chuan he game hi a hmuhnawm lo thei lo.

Tunge tha zawk!
Kum 5 kal ta a, 3rd Bn MAP kha chu nise Academy ai hian an tha zawk ngei ang. Mahse tunah chuan 3rd MAP ah hian ‘tha thin’ an tam tlat. Mahse Academy lam chu ‘tha tan chho’ annih miau avangin an tha zawkah a ngaih theih. Mahse Big Match ah hi chuan experience hi a lang duh chawk a nia.

Danmawia Vs Hruaia
Danmawia thiam zia kan ziah ngun lutuk hian a chhiartu tan a ninawm thei tih kan hria, mahse a khel lai kan hmuh apianga a thiam zia kan hmuh ziah avangin ziah a tul leh thin. Chuvangin vawiin inkhel tur ah pawh hian Danmawia hi a langsar leh viau turah ngai ila. Chutihrualin Tuikual ‘N’ player tha, Hruaia hi ball a thiam mai piah lama a tlan chak bawk avangin anni pawh hi en bik atan a tha viau ang le.

Tunge chak ang le?
Academy hi an fitness that zawk vang te, an team work that zawk vang te pawn an chak zawk ring mahila 3rd Bn MAP defender Hruaia han hriatchhuah hi chuan an in draw mai a rinawm bawk. Chak zawk an awm emaw awmlo emaw pawh nise inkhel a hmuhnawm dawn avangin hemi team te inkhel hi hmaih chi a ni lovang. Matchday 3 en turin lammual lam kan pan khawm theuh dawn nia.