Independence Day Celebration Invitation Football Tournament 2011 hi ZoFooty mumal taka a kal hnu a tournament hmasa ber tur a ni a, Sap thufing in ‘A bul tan that chu a chanve zo’ a tih angin ZoFooty pawn bul tan that chu a tum khawp mai a. Mahse bul tan tha tur chuan kan vai tanrual a ngai dawn a. He tournament hi a hlawhtling theih nan  MFA hruaitute, Club enkawltute, players te, supporters, football hmangaihtu te leh ZoFooties ho zawng zawng kawng khatah kan kal a ngai a, tumah kal peng a thiang dawn lo a ni.

Engtinnge ZoFooty in hma a lak dawn?

1. Club Page: Independence Tournament khel tur zawng zawng club page siam sak a tum a, chutah chuan club chanchin, team thlalak, team news leh squad list te a awm ang. Chu club page chu ni 31 July 2011 hian peihfel tum a ni. Shillong Lajong leh Royal Wahingdoh bik hi chu an Website link footer ah dah a ni.

Club Page ah hian kan vai tanrual a pawimawh dawn a, kan thil hriat ang ang te kan thawhkhawm khan a kimchang thei anga. Chubakah diklo lai leh tisual palh a awm pawhin kan inhrilhhriat vat khan he club page hi a rintlak lehzual dawn a ni.

2. Crossbar Challenge: Tournament boruak in Mizo mipui min chiah hneh zawk nan, Crossbar Challenge siam tum a ni. Tournament tan a hun tep tawh avangin team pathum vel chauh kan ti hman dawn a, hetah hian kan tih hmanloh te club hnenah hriatthiamna kan ngen nghal duh a ni.

3. Independence Page: Independence tournament bik page siam hi tum a ni a, chutah chuan Group Stage Standing leh Result te dah tum a ni.

4. Live Update: Live Text Update hi Semifinal atanga tih tum a ni.

5. Team News, Match Preview, Review, Results etc: A tha thei ang bera tih chu kan tum a, mahse kan tlin tawk hi duhthusam a ni dawnlo tih kan hriat chu a tha. Chumi bakah chuan hetah bik chuan kan vai tangrual a pawimawh dawn a ni.

a) Club enkawltute hnena ngenna: Team News tam thei ang ber tarlan kan duh a, chumi bakah thlalak awm thei apiang tih ang chi kha chu duhthusam a ni. Chuvang chuan Club lam pawhin mahni club news kha chu kan tih vek seng dawn loh avangin in rawn tih theih chuan a lawmawm ngawt ang. Te lua a awm lova, tun dinhmunah chuan in players lei thar te, practice dan te, inhliam ang chi te leh a dang dang kha rawn post turin kan ngen duh che u a, keimahni post kher tura in duh pawhin kan mail ah lo thawn ula, kan lo post mai dawn a ni. News kan dawn tamna club chuan news an ngah deuh dawn tih a ni.

 b) ZoFooties te hnena ngenna: ZoFooties zingah inkhel en tur kan awm nual a rinawm, kan ngaihdan te post ang zawk a ziah kha inthlahrung lo ila, a chunga kan sawi tawh khan mahni hminga kan post hreh a nih pawhin mail in rawn thawn mai turin kan inngen e.

6. Suggestion: Ngaihdan tha tak tak nei kan awm ngei ang. Ngawih bo pui mai lovin thawh tlang ila, chu chuan he tournament hi nasa zawk a, a hlawhtlinna anih mai piah lamah football tan hmasawnna anih dawn avangin kan ngaihdan te i thawh khawm leh ang u tih kha ka rawn sawi nawn leh e.