Kum 10 vel liam ta lawk pawh khan India ramah hian football academy tha a la tam lo hle a, chhiar tham lek an ni awm e. Tunah erawh grassroot leh academy lamah India pawhin hma a sawn ta hle.
Kum 1987 a din Tata Football Academy hi hun rei tak chhung India rama football academy tha ber anga ngaih a ni thin. He hmuna zirchhuak tam takin India kawr an ha tawh a, an zingah hian Mizo tlangval engemawzat an awm.
Mizo footballer hlawhtling ber zinga mi Robert Lalthlamuana hi TFA chhuak a ni a, kum 2006 batch (7th batch) a ‘Best Gentleman Cadet’ la thei a ni. TFA – in a chanchin an ziahnaah chuan ti hian an ziak a –
“He is one of the most promising midfielders of the country. Robert is soft spoken, highly motivated and a role model for others in the academy. He was the captain of the U-17 Indian Team for AFC Championship held in Kolkata in the year 2003.” tiin. Kum 2005 – a Mizoramin National U-19 kan thlen khan Jharkhand captain a ni nghe nghe.
Professional football – a luhchilh hnuah Churchill Brothers, East Bengal, Delhi Dynamos, ATK leh Northeast United tan a khel tawh a, East Bengal tan captain niin Player of the Season lawmman a dawn tawh bakah ISL club Northeast United tan captain armband a hreng tawh bawk.
India rama football inelna lian I-League bakah Durand Cup leh Federation Cup thlengin a chawi tawh a ni.
