Vawiin tlaia I-league 2nd Division qualifier match pawimawh takah Aizawl FC chuan Southern Samity 1-0 a hnehin table-ah pahnihna-ah an invawrh chho a. Chakna goal hi Captain David Lalrinmuana thun a ni.

Satindra Mohan Dev Stadium (DSA Stadium), Silchar-a inkhel hmuhnawm takah hian team pahnih te hian an chak loh chuan chance an nei chhe tawh tih hria-in an innawr nghal a. Aizawl FC-ah hian Rammawia (ITI) leh Rammawia (BVT) te chu an la inkhel thei lo a ni.

AFC manager Pu Hmingthana hnen atanga thu kan dawn danin AFC hian 4-4-2 formation an hmang a. Heng te hi first eleven te chu an ni.
Keeper – Kenneth. Defenders – Zuala, Chully, Samba, Chhuantea. Midfielders – David, T-a, Sawmtea, Biakhlua, Strikers – Michael & Abey

AFC hian Southern Samity leh United Sikkim chiah an tum tawh dawn a, an chak ve ve chuan an tlang dawn tih an hria a, hei vang hian an theih tawpin an nawr nghal a. Mahse Southern Samity lam pawh hi chak loh duh lo ve tho an ni a, an innawr tawk hle a. Goal erawh an thun teuh thei hle a ni. Southern Samity lam paw’n post te an rawn pet per ve a mahse goal an thun thei bik lova. First half-ah goal a lut lova, half time a ni zui a.

AFC lam hian half time hi an hmang tangkai ni ngei tur a ni. Second half tan tirh atang an nawr nghal a, minute 50-ah Sawmtea chuan ball rawn la lutin Captain David Lalrinmuana a pass a, ani hian a class sang tak rawn tilangin ball a lo dah rem nghal a, 19 yards atang mawi takin a pet goal a ni. Thawm a tha kher mai. Fans an sapatal a ni ber mai ! Team pahnih hi an innawr chhunzawm zel a. AFC Nigerian defender Chully chu a inhliam avangin second half-ah lakchhuah a ni a mahse AFC lam hian an goal hi hun tawp thleng an humhim thei a, 1-0 in an chak ta a ni.

Tihian AFC hian match nga khel tawhin point 10 an hmu a, United Sikkim paw’n point 10 an hmu a mahse match khatin an la khel tlem zawk a ni. AFC te hian karleh thawhtanni (20/02/2012) hian United Sikkim an tum leh dawn a, he match-ah hian AFC hi an chak anih chuan point 13 an hmu ang a, an tlang thei dawn a ni. Tin, Arhima hian United Sikkim leh Southern Samity an la tum dawn a, an chak ve ve chuan an lut thei bawk. United Sikkim pawh hian AFC an hneh chuan an lut ang. Hei vang hian AFC, Arhima leh United Sikkim te match hi a pawimawh em em vek tawh a ni.

AFC hian United Sikkim hi an hneh anih chuan I-League qualifying final round an khel thei dawn a ni. Tawngtaina lamah kan hre theuh dawn nia. Tin, Manager Pu Hmingthana chuan “Kan chakna hi Pathian vang liau liau a ni a, kan players te pawh an thawhrim em em a, Mizo mipui zawng zawng te min tawngtaipui zel turin ka sawm che u a ni. Hetih rual hian AFC-in chhiat kan tawk hi pawi ka ti tak zet zet a, nizan lamah te kan room-ah rawn kalin AFC fans anih thu te rawn sawiin kan team jersey a rawn lei bawk a. Hetianga a boral ta mai hi pawi kan ti a, kan ui hle a, min barakhaih hle a ni. Naktuk lam hian players leh hruaitu te pawh kan kal ve dawn a, mitthi chhungte LALPAN awmpui rawh se” tiin ZoFooty chu a hrilh a ni.