I-League 2nd Division qualifier hi hmun thumah khelh mek a ni a. Cuttack, Delhi leh Silchar-ah khel a ni. Mizoram atanga khel AFC leh Luangmual FC te chuan Silchar leh Delhi-ah an khel a. Luangmual FC hian Ambedkar Stadium, Delhi-ah an khel a, AFC lam hian DSA Ground, Silchar-ah an khel thung a ni.

Luangmual FC hian an match hmasa berah uihawm takin Simla Youngs FC 0-0 in an draw tawh a. Vawiin tlai dar 3 khan Ambedkar Stadium-ah an match hnihna khelin Shillong club Langsning FC chu 1-1 in draw leh a ni.

Inkhelh tantirh atang game a tang nghal em em a. Luangmual FC hian ground ball an khel tam a, players te ball in pass kual vel pawh a hmuhnawm hle a. Langsning FC lam hian players an nei tha ve bawk nen an intum tawk hle a ni. First half-ah erawh goal a lut lova.

Second half-ah 3rd MAP atanga an hawh Puitea, Sesawng chu rawn lutin minute 75-ah  box chhungah ball la lutin vanneihthlak takin an titlu hlauh mai a, Luangmual FC hian penalty an hmu ta. Match hmasa zawkah Luangmual hian penalty an hmu tawh a mahse vanduaithlak takin Striker Denga chuan a pet goal lo hlauh anih kha. Hei vang hian fans te pawh a goal hma chu an la pawr ngam lova, tunge penalty pet ang tiin an inrinsiak sup sup a. Chutah Captain Tezawka a rawn dingchhuak a, mawi takin a rawn pet goal a. Fans authawm a ring kher mai. 1-0 in Luangmual FC lam hian hma an hruai a.

Players neitha zawk Langsning FC lam hian an rawn nawr na hle a, Luangmual FClam hi an bet tan a. Minute 85-ah Langsning FC lam hian free-kick an rawn hmu a. Hemi free-kick ball rawn per let chu Luangmual FC lam hian an clear mai thei lova, buai nuaih nuaih karah Langsning FC lam hian an rawn pet goal ve ta a ni. Goal dang a luhbelh lova, 1-1 in an in draw a. Point 1 ve ve an insem ta a ni. Tihian Luangmual FC hian match hnih khel tawhin point hnih an hmu ta a ni.

Luangmual FC-ah hian Mizo player hlang an awm a, coach-ah erawh AFC B License nei Sankar Lal Chakraborty(West Bengal) an ruai thung a. Tualchhung player hlang khel annih avang leh foreign player pakhatmah an neih loh avang hian tantu pawh an ngah hle a ni.

Thu kan dawn danin match officials lam hian Luangmual FC hi an tan lo hle a, hnamdang coach inkhel en ve te paw’n match Commissioner hnenah an complain hial a ni. Hetianga Mizo pawh ni lo hnamdangin Mizo min tan vanga an complain hi a nuam dangdai ve hrim hrim a ni. An tan vak lovah a ngaih theih. Coach pakhat chuan ” Indian an ni a, Indian hlangin an khel a, foreign player pakhat pawh an nei lova, tan ve ta che u..” tiin a complain hial a ni. Tin, Tezawka nau Puia chu mipuiin an lawm hle a, ball a chan tawh phei chuan mipui an au ring thei hle a, game pawh a control hle a ni.

Hriat angin Langsning FC hi Shillong club hlun an ni a, players pawh an nei tha hle a. Langsning FC lamah hian Korean player pahnih an khel a, Midfielder leh Striker an ni a, Luangmual tan hian an hnawksak hle. Korean player pahnih te hi unau anni nghe nghe bawk. Tin, Langsning FC-ah hian Mizo player – Nundanga, Zoa leh Tluanga te an khel a ni.

ZoFooty chuan Coaching Staff Saitea (Eric-a Pa) kan be fuh hlauh mai a. Saitea chuan ” Kan players te’n an kheltha tak zet zet a, chak thei dinhmunah pawh kan ding a mahse kan chak zo ta lo a ni. Tin, Delhi mipui te’n min support tha em em, an chungah hian a bik takin lawmthu ka sawi duh a. Anni bakah hian hmun hrang hrang atanga min lo support a min lo tawngtaipuitu te chungah Luangmual FC ai awhin lawmthu ka sawi duh a, min support chhunzawm zel turin ka sawm bawk che u ni” tiin a sawi.

Luangmual FC hi karleh Nilaini hian PIFA Colaba FC nen an intum dawn a. Tin, Luangmual FC te’n match hmasa bera an draw tak Simla Youngs FC-ah khan Mizo pahnih an awm a. Kca leh Tluanga (Champhai) te an ni a. Mizo pawh Club hrang hrang hmuh tur kan awm nawk a, hmasawnna ropui tak a ni.