Kan ziah tawh angin I-League 2nd Division qualifier khelh mek zel a ni a. Nimin lamah AFC chak thu kan rawn tarlang tawh a, vawiinah chuan Luangmual FC chak thu kan rawn tarlang ve thung ang.

Vawiin chhun dar 12:30 khan Ambedkar Stadium, Delhi-ah Luangmual FC chuan 2-1 in Mumbai club PIFA Colaba FC an hneh a, Luangmual FC tan hian striker Denga chuan goal hnih a thun a ni.

Inkhelh tan tirh phat atang Luangmual FC lam hian an nawr nghal a. An match hmasa pahnihah an tumpui te an draw ve ve tawh avangin, tuntum chu draw tawh lovin chak zawk nih an tum a, an game pawh a tangin a hmuhnawm hle a ni.

First half chu Luangmual FC ta a ni deuh ber a, mahse a pawimawh ber goal an thun thei lawk lova. Mi tam takin chak loh hri an tih thin chu goal ban pet per hi a ni. Luangmual FC lam hian an pet per leh thin a, clear chance thun loh pawh a awm nual a. An in draw leh mai ang a tia hlauthawng taka fans te’n an sawi sap sap laiin Luangmual striker Denga chuan minute 30-ah a rawn pet goal hlauh mai a. Thawm pawh a ring tha khawp mai. Goal dang erawh a luh belh tawh lova, half time a ni zui a.

Second half an tan leh a, PIFA Colaba FC lam hian harhtharna an chang emaw tih mai turin an rawn khel tha a, Luangmual FC lam an bet tan a, PIFA Colaba FC lam hian goal an rawn thun ve a. Luangmual FC hi an khel a buai tan deuh a, an tang ulh niin a lang a. An vanduaina rawn belhchhah turin Luangmual FC defender Tea chuan red card a hmu leh hlauh mai a. Tun tum pawh an in draw leh dawn a nih hi, anih loh paw’n an chak dawn lo anih hi tih kha tam tak ngaihdan a ni tawh a.

Mizo tlangval rual, ral hmaah an zam ngai lo antih thin angin, kan Mizo players te hian chak loh an duh lova, draw an duh hek lo. A aia nasain an tang a, an theih tawp an chhuah a, an nawr let ve tang tang a. Fans te bei pawh a dawng tan tawh angreng hle. Mahse first match-a a penalty thun loh avanga fans te’n pressure a ngam lo anih hi tia an lo sawi Denga chuan hun tawp dawnah a rawn pet goal hlauh mai a. Luangmual FC fans an sapatal a ni ber mai. Hun a tawp zui a, Luangmual FC hi 2-1 in an chak ta a ni.

Luangmual FC hian match thum khel tawhin point nga an hmu tawh a. Vawikhat chakin vawihnih draw an nei a ni. First match-a penalty pet goal lo Denga chuan a thiam a la theihnghilh lova, pressure a ngam a ni tih lantir nan goal hnih ngawt a rawn thun nghe nghe. Luangmual FC hian Inrinni chawhnu dar 12:30 ah Mohammedan SC  an tum leh dawn a, Mohammedan SC hi kan hriat angin Kolkata club hlun leh upa a ni. Tin, match thum khel tawhin an la chak vek a ni. Chak ngei turin ZoFooty chuan Luangmual FC chu duhsakna a hlan a ni.

Neuh neuh :

* Delhi lama Mizo awm te’n Luangmual FC hi an tawiawm tha thei hle a. Luangmual FC hruaitute leh players te pawh an chungah hian an lawm tak zet zet a ni.
* Luangmual FC-ah hian Mizo player hlang an awm a, coach erawh Sankar Lal Chakraborty,West Bengal a ni a. AFC B License nei a ni.
* Luangmual player Puia, Kanan chu fans te lawm hlawh ber a ni a. A sam a sei a, Agartala club-a a khelh lai paw’n fans te’n an ngaisang thei hle. Hetianga Mizo footballer skills nei tha hi ka la hmu lova, youtube lamah a video dah a ni a. I han thlir teh ang u. Keinin kan Mizo player te kan promote loh chuan tuma’n min promote sak dawn chuang lo.