1988 a Varca Club tia din, a hnua Churchill Brothers SC tia hming thlak hi Goa a club tha te zingami a ni a. A club hi Goa Chief Minister leh Memeber Of Parliament (MP) lo ni tawh Churchill Braz Alemao in a lei a. Tunah hian Alemao chhungkua in a club hi a enkawl mek a, Joaquim Alemao chuan Chairman hna a chelh mek. Fatorda Stadium ah innghatin Goa mai nilo India club lian leh tha te zingami a ni.

Churchill Brothers SC hian lawmman a la nual tawh a. 2007 leh 2009 ah Durand Cup a lo chawi tawh a, 2008-09 season khan I-League ah champion a ni bawk. Club chetha thin tak ni mahse coaching staff lamah duhthu a samlo thin hle niin a lang. Tun season li kalta chhung ringawt pawh khan coach paruk a nei hman. Season hnih chhung hlawhtling takin Moroccan coach Karim Bencherifa in a enkawl a. A hnua coach te erawh an tluanglo hle niin a lang. Zoran Djordjevic hian I-League a champion pui hnuah a contract hi club hotute’n inhmuhthiamlohna avangin a tihtawpsak. Hemi kum vek hian All India Football Federation (AIFF) chuan ‘Coach of the Year’ ah an puang nghe nghe. Emeka Ezeugo, Carlos Pareira, Vincent Subramanium leh Drago Mamic te hi season khat an daihlo mai nilovin a then phei chu thla tlemte chauh team hi an enkawl.

Churchill Brothers SC hian kum 59 mi Manuel Gancalves Gomes, ‘Neca’ tia hriatlar chu coach atan a ruat thar a. Portuguese mi Gomes hian hun kalta te chu a thlir let lova, hun lo la awm tur te a thlir thung tih a sawi rualin Fedration Cup atan a inpuahchah nasat thu a sawi tel. Gomes hian Maldives national team a lo enkawl tawh thin a. Neca hi 2002 World Cup a Portugal team enkawltu te zingah khan a tel a ni. Luis Figo, Rui Costa, Nuno Gomes te a lo enkawl tawh thin tihna a ni. Neca hi tun season li chhunga Churchill Brothers SC coach pasarihna tur a ni ang. Hetianga a club in coach a thlak reng na chhan hi inrinsiak theih a ni a. A club neitu chhungkua te hi Goa lama thiltithei tak, thubuai pawh lo nei nual tawh te an ni a. Club hotute lam leh coaching staff te hi an inhmuthiam thinlo niin a lang.