I-League-a Mizo MC hmasa ber Asawma !

I league 2021-2022 khelh mekah Pu R. Malsawma (Asawma), Chanmari chu Match Commissioner niin I League-a Mizo MC hmasa ber a ni. Inrinni (09/04/22) khan a MC na hnuaiah TRAU leh Sudeva an inkhel a, nimin (10/04/22) khan Rajasthan United leh Real Kashmir te chu a MC na hnuaiah an inkhel leh bawk.

Asawma hi Durand Cup-a Mizo MC hmasa ber ni bawkin nikuma Kolkata-a khelh Durand Cup-ah khan a MC a ni.

Asawma chuan “Nikum khan Durand Cup ah MC ka ni tawh a, kha khan phurna leh chona nasa tak min pe tawh a, I League-a ka MC leh thei hi ka lawm hle. I League-ah hian tawp mai ka tum lova, ISL thlen ngei ka tum a, theihtawp ka chhuah zel ang.” tiin ZoFooty.com a hrilh.

India ah hian MC hi 52 an awm a, chung zingah chuan Asawma leh Lalrawngbawla te chu Mizo zinga MC awmchhun an ni.

Tata Trusts COE Manager hlui, Asawma hi ZoFooty.com chuan kan lo podcast pui tawhin a kal zelna turah duhsakna kan hlan a ni.