I-League ah Chennai City kan hmu dawn lo

December ni 26 atanga khelh tan tur Hero I-League 2021/2022 – ah champion hlui Chennai City chu AIFF in dan zawm tura a duan te an zawm famkim theih loh avangin AIFF Club Licensing Committee – in an tel a khap a, an aiah Kenkre FC an inlan ang.


“AIFF Club Licensing Committee – in hun a pek belh hnuah pawh Chennai City FC hian Club Licensing Regulations (ICLS Premier 2 Licence) an neih theih loh avang leh ngaihhnathiam an dilna chu pawm a nih loh avangin an chungah hian hremna lekkawh a tul ta a ni,” tiin AIFF thuchhuah chuan a tarlang. Chennai City hi I-League khelh phalsak an nih loh mai bakah player lakluh pawh phalsak an ni dawn lo a ni.


Chennai City FC hi kum 1946 a din niin 2016/17 season atang khan I-League an khel tan a, 2018/19 season khan an champion a ni.