I-League ah Manipuri coach pahnih inchibai

Hero I-League table kan en chuan hmahruaitu chu Minerva Punjab an ni a, NEROCA in an dawt. Team pahnihte hi vawiin chawhnu dar hnih hian an inhmachhawn dawn a, an result a zirin I-League boruak hi a alh chho hle turah ngaih a ni a. Kan thu khel tur ber erawh team pahnih enkawltute hi Manipuri ve ve an ni tih hi a ni.

Minerva coach Wangkhem Khogen Singh leh NEROCA enkawltu Gift Raikhan te hi an vanglaia football khel thin ve ve an ni a, footballer ropui an nih kan hre lo. Coaching lama an luh hnuah erawh club lian zawkte lehpelin an naute an la chetthatpui rih hle.

Gift Raikhan hian Aizawla an lokal khan fiamthuin,” Manipur hi NE-ah chuan powerhouse kan ni a, Mizoram hi powerbank in ni,” tiin a sawi a, kan footballer te’n khelmual chhungah Manipuri te tluk mahse I-League a Mizo coach inhmachhawn hun tur a nghahhlehawm hle.

Minerva enkawltu Khogen Singh hi AFC ‘A’ License nei a ni a, a kum a la upa lo a, football-ah sulhnu a la hnutchhiah dawn chauh niin a lang. Amah ang bawkin Raikhan hi ‘A’ License nei a ni a, ani phei chu a hunlaia India rama football academy tha ber pawl Pune FC Academy-a lo thawk hrep tawh a ni.

Anni pahnih bakah Manipur hian India ram pum hriat football coach lar Thangboi Singto an la nei cheu. Kum 43 a upa hi Shillong Lajong a enkawl lai khan fak a hlawh hle a, tunah hian Kerala Blasters-ah assistant coach niin youth development lamah Techincal Director a ni bawk.

FIFA U-17 World Cup team a Nicholai Adam a assistant ni thin Bitan Singh pawh sawi hmaih chi a ni lo a, Aizawla Tata Trusts Centre of Excellence-ah assistant coach a ni mek.

Footballer te’n hmasawn turin coach tha an mamawh a, mahni hnam puite duhsakna ramah hian ram puma hming lang tham Mizo coach hi tam lehzual se hma kan sawn ngei ang.

Posted in I-League, Ramchhung.

Leave a Reply

Or