I-League-ah Rajasthan United FC in pet tling!

#ZoFooty

I-League-ah Rajasthan United FC in pet tling!

2nd Division I-League hi kuminah chuan I-League Qualifiers tih a ni a, Rajasthan club Rajasthan United FC chu champion in Rajasthan ațanga I-League khel hmasa ber tur an ni.

Engtin nge an khelh?
A khelhdan phung (format) hi thlak a ni fova. Hmun khata khelh vek chang a awm a, home and away hmanga khelh chang a awm bawk. A changin team te chu zone-ah țhen niin zone champion ten home and away hmangin final round an khel leh țhin bawk.

Tun țumah erawh hmun khatah, Bangalore Football Stadium, Bengaluru-ah khelh vek a ni.

Kumin I-League Qualifiers ah hian team 9 awmin group hnihah țhen an ni a, vawikhat țheuh an inkhelh kual hnuah a sang 2 ten final round an lut a. Tichuan, final round lut team 4 te chu vawikhat țheuh an inkhel kual leh a, chuta sang ber Rajasthan United FC chuan Hero I-League 2021-2022 an khel dawn a ni.

Tun hmain Aizawl FC bakah Luangmual FC, Chanmari FC leh Chhinga Veng FC te chuan 2nd Division I-League hi an lo khel tawh țhin a, Aizawl FC tih loh chu I-League-a in pet kai an la awm lo.

Tute nge khel?
A tirah team 10 an thlang zet a mahse Hyderya Sports FC (J&K) an khelh leh tak loh avangin team 9 chauhvn an khel ta a ni. Heng zinga team 6 te chu an vawikhat inlanna tur niin RA FC (Gujarat), Kenkre FC (Maharashtra) leh FC Bengaluru United (Karnataka) te erawh an lo inlan tawh a ni.

I-League Qualifiers khel team 9 te chu

Corbett FC (Uttarakhand)
Delhi FC (Delhi)
Madan Maharaj FC (Madhya Pradesh)
Rajasthan United FC (Rajasthan)
ARA FC (Gujarat)
Kenkre FC (Maharashtra)
FC Bengaluru United (Karnataka)
Kerala United FC (Kerala)
Ryntih SC (Meghalaya)