I-League club Mumbai FC chuan Chennaiyin FC atangin ‘loan’ in Thoi Singh an lalut.
Kum 26 a upa Manipuri midfielder hian tunhma in Mahindra United, Salgaocar, United Sikkim, Mumbai Tigers leh Bengaluru FC tan hlawhtling takin a lo khel tawh a ni.
Santosh Kashyap a enkawl Mumbai FC hian Arata Izumi, Reagan Singh, Munmun Lugun leh Seityasen Singh te pawh lak tumin an hel mek nia sawi a ni.
Hetih lai hian I-League club thar Minerva Punjab FC chuan Indian football a rawlthar tha ber pawl ni thin Uttam Rai, Anirudh Thapa, Prosenjit Chakraborty leh Baoringdao Bodo te an lalut.
Sikkimese striker Rai hi India tan age level a goal thun thei tak, IMG Soccer Academy, Florida ah te pawh lo awm tawh a ni a, India ramah Dempo SC leh Chennaiyin FC tan a khel tawh.
Assam state a Mizo tamna Haflong khaw tlangval Baoringdao Bodo hi 2016 IFA Shield a Best Player kha a ni a, amah ang bawkin a thiante Prosenjit Chakraborty leh Anirudh Thapa te hi India tan age level hrang hrang a lo khel tawh, France club FC Metz a training nei tawh an ni.
Minerva ah hian Aizawl FC tan pawh a lo khel tawh Joel Sunday kan hmu bawk ang.
Chennai City FC pawh an awm mai mai lo a, Portuguese club Alvarenga atangin Brazilian striker pahnih Marcos Tank leh Charles te an lalut.
+ There are no comments
Add yours