I-League club thar Sudeva leh Sreenidhi

All India Football Federation chuan thuchhuah siamin I-League – ah club thar pahnih Sudeva FC leh Sreenidhi FC an lawmluh thu an puang. Delhi khawpuia inkulh Sudeva hian season thar atangin I-League hi an khel tan ang a, 2021-22 season atangin Visakhapatnam – a inkulh Sreenidhi FC hian an zawm ve leh ang.
 
Hemi chungchangah hian AIFF League committee chairman Subrata Dutta, AIFF General Secretary Kushal Das leh I-League CEO Sunando Dhar te chuan lawmpuina thu an sawi a ni.
 
Kum 2014 – a din Sudeva hi Sudeva Moonlight FC ti pawhin hriat an ni a, anmahni enkawltu chu Sudeva Group niin Anuj Gupta leh Vijay Hakari te chu a dintu an ni. Naupang chher hriam lamah hma nasa tak a lain Delhi Senior Division – an khel bawk. Kum 2016-17 season khan I-League second division khel vein an group – ah mawngphah an ni a, senior team aiin an youth team lam sulhnu a tha zawk. Mizo tlangval PS Lalngaihzuala chu Sudeva U-15 coach hun engemawchen a ni tawh a ni.
 
Naupang zawk te hmantlak ni tur a chher hriam chu an thupui ber ni chhoin club thangduang tak an ni bawk a, India ram khawpui ber Delhi atanga I-League club hmasa ber an ni dawn ta a ni.
 
Kum 2020-21 atanga I-League khel tur Sreenidhi FC hi kum 2015 – a din niin anmahni dintu chu Sreenidhi Educational Group niin anni hian international school leh engineering college an nei bawk !
 
Hyderabad league te khelin grassroots lamah nasa takin tan an la bawk a, club naupangte ni mahse technical director atan Portuguese tlangval Fabio Ferreira an lak theih avangin hma thlir thui tak an nei tih a chiang.