Janury 14, 2012 khan I-League gameweek 14 khelh chhunzawm a ni a, Dempo SC leh Sporting Clube de Goa ten an tumpuite an hneh ve ve. Inrinni zanah hian match 5 awmin, match 3 ah chuan 0 – 0 vekin inkhel a tâwp a ni.

Dempo SC 2 – 1 Chirag United

Season bul ṭan ṭha em em, tunhnaia chak leh chak loh karthlak deuh reng Dempo SC an chak a, an mikhual Chirag United chu 2-1 a hnehin I-League hmahruaitu an nih chhunzawm zel.

Inkhel an ṭan deuh chiah a, minute 5 lekah India international Clifford Miranda chuan Peter Carvalho thawhrah sengin a pet goal. He goal ‘assist’ tu Carvalho hian Chirag United defender te a bum mawi kher mai. Minute 27 ah Perreira through ball changtu, I-League top scorer ni lai Ranti Martins chuan Dempo goal hnihna a thun zui. Martins hian I-League ah ringawt goal 15 a thun tawh!!! Chirag United hian minute 29 ah an rawn pet goal ve leh nghal a, C Vineeth chuan free-kick aṭangin goal mawi tak a thun.

Second half-ah team pahnihten chance an nei ngun malh malh khawp mai a, mahse goalkeeper pahnihte an che ṭha a, chance awlsam deuh nia lang pawh striker ten an miss leh tlat ṭhin bawk nen, goal dang a luhbelh ta lo a ni.

Dempo hian game 14 ah point 30 hmuin ha an hruai mek a, Chirag United hian point 11 an hmu tawh bawk.

Inkhel dang result

Mizo tlangval Jeje Lalpekhlua khelhna Pune FC leh East Bengal te chu goal awm loin an inhnehtawk a, he inkhelah hian East Bengal defender Robert Lalthlamuana pawh substitute-ah awmin a lut lo thung.

AIFF in Indian player beiseiawm rual a dahkhawmna, Pailan Arrows an chak thei lo tluang zel a, an mikhual Sporting Clube de Goa lakah 2-3 in an tlawm. Air India leh Shillong Lajong te inkhelah goal a lût lo a, Prayag United leh HAL Bangalore te pawh 0 – 0 bawkin an inhnehtawk.

Pune FC 0 – 0 East Bengal
Pailan Arrows 2 – 3 Sprting Clube de Goa
Air India 0 – 0 Shillong Lajong
Prayag United 0 – 0 HAL Bangalore

I – League table