I-League hmachhawn turin Aizawl FC inpeih

Naktuk hian I-League season thar khelh tan a ni dawn a, tlai dar 4:00 ah Aizawl FC in Roundglass Punjab FC hmachhawnin bul an tan ang. Tarlan tawh angin tun season I-League hi Kolkata khawpuiah khelh a ni dawn a, naktuk tlai inkhel hi 1Sports Channel – ah LIVE in pekchhuah a ni dawn a, Zonet Channel No. 313 leh LPS Channel No. 66 – ah te en theih a ni ang.
 
I-League champion hlui pahnih inkhel turah hian Covid-19 vanga harsatna nei Stanley Rozario chuan Aizawl FC a la ho thei dawn lo a, vawiin pre-match press conference – ah pawh asst. coach Gosen Rammawia a thu. “Kan coach ber tel lo a khelh chu kan tan pawh chona lian tak a ni dawn a, mahse result tha neih kan tum. Neutral ground – ah entu awm loa khelh tur a nih dawn avangin player – te pawhin pressure tel loa tha taka an khelh theih ka beisei,” tiin a sawi.
 
Aizawl FC hian foreigner pathum an nei a, captain Alfred Jaryan leh season hmasa lama an lo chhawr tawh Richard Kassaga te an chelh bakah Nigerian striker Princewill Emeka Olariche an la thar. Anni bakah hian an player hlui, club dang atanga lak let an nei nual a, team inkhairual an nih a beiseiawm.
 
An khingpui tur Roundglass Punjab FC pawh hi tun season I-League a champion beisei ngam tur zinga mi an ni a, ISL leh I-League lama tawnhriat lo nei tawh an kawl nual.
 
Aizawl FC squad :
 
Goalkeepers: H Lalremruata, Lalmuansanga, Zothanmawia
 
Defenders : Richard Kassaga (Uganda), K. Lalmalsawma, Lalchungnunga, C. Lalrosanga, Lalthakima, Vanlalzuidika, PC Laldinpuia, Lalfelkima, Lalmawizuala
 
Midfielders : Alfred Jaryan (Liberia), K.Lalhmangaihkima, Peter Lalduhawma, Ramhlunchhunga, Rohmingthanga Bawlte, Lalengmawia, R. Malsawmtluanga, Joseph Vanlalhruaia, David Laltlansanga, Brandon VL Remdika, Lalmuanzova, H. Lalmuankima
 
Forwards : Princewill Emeka Olariche (Nigeria), David Lalhlansanga, F.Lalremsanga, MC Malsawmzuala, Lalrammawia, Lalliansanga