I-League : Kolkata a tlawm duh lo Aizawl FC

Zanin Hero I-League inkhelah East Bengal in goal hnihin hma hruai mahse champion lai Aizawl FC in team huaisen an nihzia lantirin 2-2 in an inthathen a, mualneitu lam midfielder Katsumi Yusa chu man of the match atan thlan a ni.

East Bengal XI (4-1-4-1): Mirshad; Mehtab, Salam, Eduardo, Deepak; Armand; Katsumi, Al-Amna, Rafique, Brandon; Plaza

Aizawl FC XI (4-4-2) : Avilash Paul; Lalrinzuala Khiangte, Masih Saighani, Kareem Omolaja, Lalramhmunmawia; Dodoz, David Lalrinmuana, Alfred Jaryan, H.Lalmuankima; Yoga Kobayashi, William Lalnunfela

First half-ah Aizawl FC in bul an tan tha a, inkhel an thunun bakah corner hmasa ber an hlawhchhuak. Goal hmaah erawh mualneitu an hlauhawm zawk a, Willis Plaza chuan minute 15 chhungin goal thunna hun remchang vawi hnih a hmu.

I-League a Aizawl FC champion nan a thawhhlawk tak East Bengal midfielder ni ta Mahmoud Al-Amna a tangkai bakah counter-ah Brandon VL Remdika a hlauhawm teuh thei hle a, Alfred Jaryan-a’n a pawt thlu hman hlauh.

Willis Plaza bawk a lo lang leh a, minute 34-naah post pet per dawtin Aizawl FC fans te an thaw dep dep.

Second-half ah erawh Khalid Jamil a naute’n bul an tan tha a, Plaza leh Amna te goal thun tur chu Aizawl FC goalkeeper Avilash Paul-a’n a lo dansak. A club hlui lakah Avilash a khel tha a, minute 66-naah erawh Katsumi corner pet Brandon-a tauh pial chu Eduardo Ferreira chuan an goal hmasa ber ni turin a tauh lut.

Hemi hnu lawk hian Md.Rafique a pet chu Katsumi hian a ke a lo dangin ho takin a goal a, Japanese attacker in a club thar tana a goal hmasa ber a thun.

Champion lai an tlawm mai dawn emaw tih hnuah minute 74-naah David Rinmuana free-kick atanga ball kal chu William-a’n goal-ah thunin injury time-ah Mka thawhrahah Aizawl FC in corner hmu in bench atanga lut K.Lalthathanga (Puitea) ke atanga ball chhuak chu buai nuaih nuaih karah William Lalnunfela’n a vanneihna kaltluan tir zelin an siphurh sut nan a thun a, 2-2 niin hun a tawp.

Aizawl FC hian December ni 13 (Nilaini) chawhnu dar hnihah Churchill Brothers an mikhual ang.