I-League round 9 khelh mek a ni a, Thawhlehni-ah Goan club Churchill Brothers leh West Bengal club Mohun Bagan ten an khingpui an hneh ve ve a, Nilaini-a East Bengal hmachhawn tur Dempo SC nen an inthlauhna a tlêm tawh hle. Pathianni zan khan Shillong Lajong FC chu an lo chak tawh bawk a ni.

Shillong Lajong FC 2 – 1 Mumbai FC

Guwahati-a Shillong Lajong leh Mumbai FC te inkhelah hian Lajong lamin bul an ṭan ṭha zawk a, inkhel pawh an thunun viau. Mahse minute 30 ah Kingsley Chioma chuan Mumbai FC tân a pet goal a, hei hi first half-a goal awmchhun a ni.

Second half-ah Lajong bawk an khel ṭha a, minute 56 ah Mizo tlangval  P.C Lalhlimthara (Mahlima) chuan an siphurh sût in, minute 74 ah Eugeneson Lyngdoh chuan Lajong chakna goal hi a thun ta a ni. Mizo tlangval rual khelhna Lajong hi tun season-a vawithum an chakna a ni a, game 9 ah point 12 hmu tawhin pariatna an ni mek. Point 7 hmu tawh Mumbai FC hi 11 na an ni thung.

HAL Bangalore 2 – 4 Mohun Bagan

India ram mai ni lo, Asia khawmualpuia club upa leh hlun ber pawl Mohun Bagan chuan goal 2 an phurh zet hnuah HAL Bangalore lehthalin hnehna an chang.

Inhliam Sunil Chhetri tel lova khel Mohun Bagan hi first half-ah an khel ṭha zawk mah a. Mahse minute 26 ah dinglam aṭanga ball lo kal chu vengtu nei lo HAL striker Malemngamba Meetei chuan a lo head goal a, minute 31 ah Jagaba Amaba chuan HAL goal hnihna a thun. Heng goal pahnihte hi Bagan centre back te chet muan vanga lût ve ve a tih theih awm e.

Second half-ah Bagan in an nawr ta tak tak a, minute 60 leh 70 ah I-League player zinga hlawh hnem ber leh goal thun hnem ber (all time) ni bawk Nigerian striker Odafa Okolie chuan Bagan tân a thun. HAL lam pawhin goal thun theihna chance an nei nual a, vawikhat phei chu goal bar an tih per a ni. Chak zawk awm lovin an inṭhen mai dawn emaw tih hnu, minute 88 ah Jewel Raja chuan Bagan goal 3 na a rawn thun a, Manish Maithani chuan injury time-ah a pet goal bawk.

Mohun Bagan hian game 9 ah point 19 hmu tawhin 3 na an nih chhunzawm a, HAL hian point 1 chiah la hmuin table mawngphahah an awm mek a ni.

Chirag United Kerela 1 – 2 Churchill Brothers

Tunhnai kum 5 vel kalta chhung kha chuan I-League-ah Goan club leh Bengal club te an inel a ni ber a, Goan club te hi a che ṭha zawk an ni nghe nghe. Kum 2008-09 champions Churchill Brothers chu Chirag United khel turin Kerela-ah an zinchhuak a, harsa takin point 3 an hlawhchhuak.

He inkhelah hian Chirag United an khel ṭha hle a, Anil Kumar hmangin goal an khung hmasa zawk. First half-ah Goa club ṭha hi an che hleithei meuh lova, mahse minute 45 ah Opara chuan an siphurh a sût. Second half-ah pawh ‘home team’ bawk hi a hlauhawm zawkah an ṭang a, goal chance ṭha tak tak an ṭhelh hnem ngei mai. Churchill Brothers in an chance neih te an ṭhelh ve si lova, minute 74 ah substitute Mohammed Rafi chuan an chakna goal hi a thun a ni. He goal hi Lalrindika Ralte  siamsak a ni nghe nghe. Didika hian goal bar vawi 1 a tauh per bawk a ni.

Churchill Brothers hian game 9 ah point 20 hmu tawhin 2 an an ni a, game 1 a la khel tlem zawk Dempo SC an phak lohna chu point 1 chiahin an inthlau tawh. Point 5 hmu tawh Chirag United hi 12 an ni.

Result dang

Sporting Clube de Goa 1 – 3 Air India
Sporting: James Moga 8′
Air India: Sandesh Gadkari 34′, 85′, Henry Ezeh 90′ 

Pailan Arrows 0 – 0 Prayag United