I-LEAGUE : NAKTUK ZANAH CHAMPION LAI INLAN DAWN

A club hlui hmachhawn tur Khalid

Season hmasaah India ram nghawr nghing dawt khawpin Aizawl FC in nomawi an chawi a, anmahni champion puitu Khalid Jamil erawh East Bengal coach a ni tawh. “Chona lian tak a ni dawn a, bul tan that kan mamawh hle dawn. Team tha hmachhawn tur kan ni a, game awlsam a ni dawn lo tih ka hria,” tiin I-League a tawnhriat ngah tak Jamil chuan a sawi.

“Aizawl ka chhuahsanna kha a rei ve leh tawh a, East Bengal-ah hian ka bet leh viau tawhin ka hria. Tunah chuan club dang ka ngaihtuah lo a, kan game khelh hmabakah hian tha taka khelh chauh ka duh a ni,” a ti bawk.

Khalid Jamil hian Aizawl FC champion team-a player thenkhat a kawl a, Laldanmawia Ralte, Brandon VL Remdika leh Lalramchullova te hi Calcutta Football League an chawi theih nan a player pawimawh an ni a, hmatawngah Mahmoud Al-Amna, Willis Plaza leh Katsumi Yusa a neih bawk avangin an tawh a khirh hle ang.

Meneses-a tan fiahna

UEFA Pro License nei Paulo Meneses-a’n tualchhung football-ah Aizawl FC tha takin a khelh pui thei a, an champion nomawi humhim an tumna I-League inelna erawh a la hmachhawn ngai lo. Portuguese coach hian a game hmasa berah team tha leh hlun a hmachhawn dawn avangin a tan game pawimawh bik a ni.

“Team tha an nihzia kan hria a, chu chu kan tan chona a ni, anni hmachhawn tur hian kan inpeih tawh e,” tiin a sawi. I-League Best Midfielder nilai Alfred Jaryan-a chungchang sawiin,” Indian football-a player langsar tak a ni a, kan inkungkaihna pawh a tha hle. Tawnhriat a ngah avangin eng team-ah pawh khel se a tangkai hle ang,” tiin a fak.

Meneses hian Kolkata khawpuia a hruai zinga Liandala (Sena) chu training naah a inhliam avangin a chhawr thei dawn lo a, Andrei Ionescu pawh hruai mahse a dinhmun a la chiang lo bawk. Aizawl FC leh East Bengal te hi season hmasa khan Kolkata khawpuiah 1-1 in an lo inhnehtawk tawh a, naktuk zan hian Kolkata Mizo te’n an tawiawm that a pawimawh hle ang.

East Bengal Probable XI:

Goalkeeper : Mirshad Michu

Defenders : Mehtab Singh, Arnab Mondal, Gurwinder Singh, Deepak Kumar

Midfielders : Brandon VL Remdika, Mahmoud Al Amna, Armand Bazzaou, Laldanmawia Ralte

Forwards : Katsumi Yusa, Willis Plaza

Doubtful – Eduardo Ferreira

Aizawl FC squad :

Goalkeepers : Lalawmpuia, Avilash Paul, Arup Debnath

Defenders : Lalramhmunmawia, Lalhriatrenga, Lalrinzuala Khiangte, Lalrozama Fanai, Masih Saighani, Kareem Omolaja

Midfielders : H.Lalbiakthanga, David Lalrinmuana, Alfred Jaryan, F.Liandala, K.Lalthathanga, Albert Zohmingmawia, H.Lalmuankima, Leonce Dodoz, Andrei Ionescu

Forwards : William Lalnunfela, Yugo Kobayashi

Team Officials : Hmingthansanga (Manager), Paulo Jorge Meneses (Coach), Izan Martin Andres (Asst.Coach), RK Zothanpuia (Physio)