I-League round 7 khelh zawh a ni a. Dempo chuan an tumpui Lajong an hneh avangin hma an hruai chhunzawm zel a, an la chak vek bawk a ni. Round 7-ah hian match 7 awmin goal 28 zet a lut a ni. Inkhel ilo thlir dawn ang.

23th November-a inkhel te :

Prayag United 3-2 Mohun Bagan
(Oraon 41’, Yakubu 56’, 58) (Snehashish 21’, Odafa 46’)

Bagan hian Kolkata derby-ah East Bengal an hneh zo chiah a, an phur khawp mai. Mahse an phur rei lo hle. Prayag erawhin an match hnuhnung berah Salgaocar an draw thung a ni. Inkhel an tan a, Bagan hian Snehashish goal hmangin hma an hruai a,1^st half zawh hma deuhah Prayag lam hian Oraon goal hmangin an siphurh an rawn sut a. 2^nd half tan tirhah Odafa goal hmangin Bagan lam bawk hian hma an rawn hruai leh a. Mahse minute 10 hnuah Yakubu chuan Prayag tan a rawn thun veleh a. A hnu minute hnih leka Yakubu vekin ti goal lehin Prayag lam hian 3-2 in hma an rawn hruai ta daih a. Hun tawp thlengin goal dang a luh belh lova, Prayag an chak zui ta a ni. Prayag-ah hian S.Malsawmtluanga chu a inhliam avangin a khel thei lova. Bagan lamah hian an Brazilian playmaker Barreto khelh loh an tuar a tih theih. Tihian Bagan hian point 15 hmuin table ah pahnihna dinhmun an hauh chhunzawm thova, table leader Dempo aiin point 6 zetin an hniam a ni. Prayag hian tun season-ah chak loh an la nei miah lova, draw erawh vawili ngawt an nei thung.

HAL SC 1-8 East Bengal
(Jagaba Amaba,pen-16’) (Robin Singh 7’, Tolgay 48’ 59’ 71’ 86’, Uga Okpara 26’ 36’ Balijit Sahni 75’)

He inkhelah hian goal 9 ngawt a lut ! HAL hi home team zawk ni mah se mikhual zak thei lo tak East Bengal hian Mohun Bagan laka an tlawm kha inhrikthlak nan an hmang a ni ber. European team te pawh hi an ni duh chawk. Derby match emaw big match deuha an chak loh hi chuan an club tum leh tur te hian an lo huphurh thei lutuk anti thin a, HAL ho pawh hi chutiang dinhmuna ding chu niiin ka hria. Suspend vanga Kolkata derby khel thei lo, Australian striker Tolgay Ozbey pawh a rawn khel leh thei a. Goal 4 zet a rawn thun nghe nghe. Uga Okpara paw’n goal 2 a thun a. Robin Singh leh Balijit Sahni  te chuan goal 1 ve ve an thun bawk. HAL tan Jagaba Amaba chuan penalty atang goal 1 a rawn thun ve a ni. Tihian Bagan an hneh lo hmingchhe lutuk tur pawh a rawn khuh veleh deuh. East Bengal-ah hian Robert Lalthlamuana paw’n full-time a khel a ni. HAL hian match 7-ah goal 18 chhuah tawhin goal 4 chiah an la thun a, table mawngah an awm a ni.

Mumbai FC 2-1 Sporting Clube de Goa
(Ebi Sukore,pen 45’, Friday Gbeneme 50’) (Fernandes 87’)

Tun season-a an vawihnih chakna turin Mumbai FC chuan Sporting Club 2-1 in an hneh a.1^sthalf tawp dawn tepah Sporting player Rojen Singh chuan Mumbai FC striker Sukore chu box chhungah titluin penalty an hmu a. Sukore chuan ‘cool’ zetin a pet goal a. Hun a tawp zui a ni.2^nd half an tan a. Midfield-ah an inchai tawn zak zak a. Sporting lam hian chance an rawn nei leh zauh thin a, mahse Mumbai FC goalkeeper Sanjiban Ghosh chuan a lo dang hman zel a. Minute 50-ah Mumbai lam hian chance rawn nei lehin Cavin Lobo chuan Friday Gbeneme chu pass-in ani hian a lo ti goal a ni. Sporting hi an beidawng duh mai bik lova, an siphurh hi sut tumin theih tawpin an tang a. Minute 87-ah Sporting lam hian Fernandes hmangin goal 1 chu an rawn thun ve a. Sporting hian hun tawp dawna an missed zo zai kha chu an ui ve khawp ang le, chak thei dinhmunah an ding asin le.

Dempo SC 5-0 Shillong Lajong FC
(Anthony Pereira 3’ 35’, Koka Sakiko 22’, Ranti Martins 50’, Clifford Miranda 52’)

Dempo SC chuan an thiam anla theihghilh lova,  5-0 ngawtin Lajong an sawp a ni. Tihian match 7 khel tawhin an la chak fai vek a. Inkhelh tan hmain Lajong hian hei hi hriain an fimkhur hle a. Inkhel an tan a, Samir Naik, Ranti Martins leh Pereira te chuan ball play mawi tak rawn neiin tan atanga rei lo teah Pereira chuan a rawn ti goal nghal a. Minute 22-ah Sakiko chuan rawn ti goal lehin Pereira hian minute 35-ah goal a rawn thun leh a. Lajong tan hian beisei a chau tawh hle a ni. Mizo tlangval rual khelhna Lajong hi an bedawng duh bik lova, an theih tawpin an rawn nawr let ve thin a mahse team tha zawk nge nge chu an lo chungnung deuh a ni. 2^nd half-ah Ranti Martins leh Clifford Miranda te chuan goal 1 ve ve an rawn thun leh bawk a. Goal dang a luh belh lova, 5-0 in Dempo hi an chak ta a ni. Lajong hi an chak loh avang hian an chhe ta tihna a ni lo. Game-ah chuan engpawh a thleng thei. Team tha zawk an tum a, an vanduai ve bawk a ni. Dempo hian goal 23 teh meuh an thun tawh a, an lamah erawh goal 2 chiah ala lut a ni. Tun dinhmunah chuan position tinah an tha falin an form em em a ni. Lajong mai bakah team tha tak Mohun Baga pawh 5-0 ngawtin season tantirh khan an lo hneh tawh a ni.

24th November-a inkhel te :

Pailan Arrows 1-1Chirag United
(Sabeeth 53’) (Saleel 30’)

He inkhelah hian Chirag United tan Saleel chuan minute 30-ah goal a rawn thun a. Hemi hnu lawk hian Chirag defender Charles Dzisah chuan Malsawmfela a tlawh avangin direct red card a hmu a. Pailan lam hian an siphurh sut tumin tan an rawn la a, mahse 10 chauha khel Chirag lam hi an tang thei hle a. Minute 53-ah Pailan lam hian free-kick an hmu a, Sabeeth chuan head goal-in an siphurh a sut a ni. Pailan lam hian tun season-ah chak an la nei lova, a vawikhatna atan chak an tum hle a mahse beiseina beidawnthlak mai a ni ta si. Sabeeth leh Milan te inkawp hian chance vawi 4 vel ngawt an nei a, an finishing a that tawk loh vangin an chance an missed vek a ni. Goal dang a luh belh tawh lova, point 1 ve ve an insem ta a ni.

Pailan Arrows hi Indian rawlthar rual awmkhawmna niin AIFF club a ni a. India-in World Cup kan khelh ve theih beiseia AIFF-in a din a ni. Tunah hian Mizo rawlthar pahnih Malsawmfela leh Rozama te an khel mek a ni.

Salgaocar SC 1-1 Churchill Brothers SC
(Chidi 70’) (Opara 50’)

Sunday khan Kolkata derby kan en a, Bagan chuan East Bengal an hneh anih kha. Niminah erawh Goa derby kan en ve thung. Salgaocar hi champion lai an ni a, mahse tun season ah hian match 7-ah match 3 ngawt an chak tawh lo a ni. Churchill erawh vawi 1 chiah chak loh an la nei a ni. Churchill hian minute 50-a Opara goal hmangin hma an hruai a. An chak chuan table ah pahnihna an ni thei tih pawh an hria a, chumi pawh chu an tum a ni ber a ni. Mahse minute 70-ah home team tan Chidi chuan rawn ti goal ve lehin Churchill beiseina a rawn tibo a ni. Goal dang a luh belh tawh lova, point 1 ve ve an insem a ni. Churchill-ah hian India International player Lalrindika Ralte a khel a. Tin, Jerry Zirsanga pawh 1^st eleven-ah awm lo mah se a hnuah a rawn lut a, chance a rawn nei ve nghe nghe. Tihian Churchill hian point 14 hmuin table-ah pathumna an ni mek a ni.

Pune FC 2-0 Air India
(Mandjou Keita,pen – 40’, Othello Tabia 74’)

Pune FC hi a zawnin match thum an chak tawh lova, an home ground a ni bawk a, chak an tum hle a ni. Air India hi table-ah chuan sang zawk mah se Pune FC hian an ngam angreng viau a. Pune FC tan hian East Bengal atanga loan-a an lak thar Abhra Mondal chuan rawn start-in goal a rawn veng a, a rawn che tha hle a ni. Minute 41-ah Air India defender Manjit chuan box chhungah Pune FC striker Keita a titlu a. Penalty pek an ni a. Keita vek hian a rawn pet goal a ni. 2^nd half ah erawh Air India lamin bul an rawn tan tha hle a, Pune FC keeper Abhra Mondal pawh a rim malh malh khawp mai. Mahse Pune midfield hi Douhou chuan a control hneh hlauh a, Air India lam hian chance mumal an nei thei bik lo a ni. Minute 70-ah Tabia chuan a rawn pet goal leh a. Goal dang a luh belh tawh lova, 2-0 in Pune FC an chak a ni. Tihian, Air India chu a zawna match 4 chak loh nei lova an kal tluang lai record chu Pune FC hian an lo tihtawp sak a ni. Pune FC erawh a zawna match 3 an chak loh hnua an rawn chak lehna chiah a ni thung. Tin, Pune FC hian an keeper chhuanvawr Subrata Paul inhliam hnuah goal an chhuah hnem a, goalkeeper rinrawl an nei lova. Chuvang chuan Abhra Mondal hi a hun taka an la atih theih. Pune FC ah hian Jeje-a pawh a khel a ni.