India chak ta!

#ZoFooty India chak ta!
SAFF Championship khelh mekah India chuan zanin dar 8.30 khan an match thumna khelin 1-0 in Nepal an hneh hram a, point thum hlu tak an hlawhchhuak.


Tihian India in match thum ah point nga hmuin pathumna dinhmun an luah a, Nepal leh Maldives in point ruk ve ve an hmu thung.


Inkhel chungchang

National Football Stadium, Malé, Maldives-a inkhelah hian India coach Igor Štimac chuan match hmasaa goal awm lova Sri Lanka draw tu ațangin starting XI panga lai thlakin Lalengmawia (Apuia) pawhin inkhel bul a țan ta a, mahse centre back pangngai awm lo bawkin an khel leh a ni.


Nepal hian an chak chuan final an lut dawn tih hre mah se match khat an la neih avangin fimkhur takin an khel a, India erawhin chak an mamawh tih an hriat avangin an nawr thung a, Apuia hmangin midfield ah ro an rel a ni.


India Captain Sunil Chhetri-a’n first half chawhnu lamah chance tha a țhelh a, goal ruakah a khung lo. Hemi hnu hian Apuia ball vawrh luh țha tak chu Chhetri-a’n Manvir Singh tan head thlak sak mah se Manvir hian ball a control thei lova, a pet goal lo.
Second half ah pawh India bawkin inkhel an thunun a, mahse an chance neih an hmang țangkai thei lo. Manvir Singh chuan Yasir Mohammad-a ball cross a tauh goal ngei dawna a lan laiin Nepal Captain leh Goalkeeper Kiran Limbu chuan a lo beng chhuak hman a, hemi hnu hian defender Subhashish Bose pawn a head goal thei bik lo.


Mamawh chhanna Chhetri

A tawpah hi chuan Sunil Chhetri bawkin goal a khung leh nge nge zel. India in huntawp dawnah goal chhuah huamin defender pathum chauh dahin an nawr a, Chhetri hmangin minute 82 naah goal an khung ta nge nge a, he goal hi an chak pui ta a ni.


India hian ball possession 75% lai changin shot vawi 20 lai an nei a, goal zawn (target) ah vawi nga an pet bawk. Nepal erawhin goal zawnah vawikhat mah pet an nei lo thung.


India hmabak

India hian ni 13 zan dar 8.30 ah a thlengtu leh champion lai Maldives an hmachhawn leh ang a, an chak chuan final an lut ang.