India rama a vawikhat nan Mizoramah Young Legends’ League

Kum 12 hnuai lam te football inelna tur Young Legends’ League chu nimin khan Aizawla Hotel Regency-ah hawn a ni.

‘Baby League’ tia hriatlar YLL-ah hian kum 12, kum 10 leh kum 8 hnuai lam te chu coaching pek an ni ang a, anmahni kum bithliahah theuh inelna an nei thin dawn a ni.

He YLL atan hian MFA leh 8One Foundation chuan kum 10 chhung thawk dun turin inremna an siam a, MFA aiawhin Honorary Secretary Pu Lalnghinglova Hmar chuan hming a ziak a, 8One Foundation aiawhin a dintu Varun Achreja chuan hming a ziak bawk.

Pu Tetea Hmar chuan thu sawiin,” He YLL kaltlang hian kum naupang zawkte’n inelna thianghlim tak hnuaiah an thiamna an phochhuak thei dawn a. Naupangte talent tihpun a, football khelh theihna hun tam zawk pek hi MFA duhdan a ni,” tiin inremna an ziak avanga naupang tam takin football khelhna hun leh hmun an neih phah tur chu lawmawm a tih thu a sawi.

8One Foundation dintu Varun Achreja pawhin thu sawiin,” He inelna kaltlang hian naupangte hnenah football mai bakah zirna te, hriselna chungchangte leh midangte nena thawh ho dante zirtir kan tum a, Champhai mipui zawng zawngte an fate thanlenna kawnga min tawiawm theuh turin ka sawm a ni,” a ti bawk.

Enge YLL ?

India ramin football-ah hma a sawn chho zel a, kum naupangte nihlai atanga football zir thatzia leh hlawkbikzia kan hre chho zel. ‘Baby League’ hi ram changkang zawkah te chuan an uar hle a, tunlaia footballer lar tam tak hi kum naupangte an nihlai atanga mumal taka football zir tawhte an ni hlawm.

Young Legends’ League hi sawi tawh angin India rama a hmasa ber tur a ni a, Champhaia Chhangphut Field-ah kalpui a ni ang. Team 12 awm tur te hian under 8, under 10 leh under 12 team an neih theuh a ngai a, category tinah hmeichhe player pakhat tal an neih ngei ngei a ngai bawk.

5-a-side a khelh tur he league hi ruahman dan chuan kumin November ni 11 atanga nakum July thla thleng khelh tur a tih a ni a, team tinte vawi thum theuh inkhel kualin team tinin season khatah match 33 tal an khel dawn tihna a ni. Inkhelh hi inrinni emaw school chawlh hun remchangah kalpui tum a ni.

Inkhelh apiangin man of the match thlan ziah a ni ang a, season tawpah kum bithliah hrang hranga champion team hnenah lawmman pek an ni bawk ang.

He YLL-ah hian naupangte mai bakah coach leh referee te tan inzirna tha tak a nih a rinawm a, sum senso zawng zawng hi 8One Foundation tum tur a ni.

YLL-a tel naupangte tan school kal leh zirna chungchang an ngaih pawimawh thu Varun Achreja hian a sawi uar hle a, chu mai bakah an hriselna lam thlengin enkawl an ni dawn a, engtik lai pawhin ground-ah hian doctor duty an awm dawn a ni.

Hei mai bakah hian mithiamte ruaiin ei leh in tha chungchang te, personal development leh gender equality chungchangah te a tul angin zirtirna an pe thin dawn a ni.

(Pic: MFA)