Hmingsanga
Lengzem & Zozam Weekly Sports Writer

India hian kum 2014 World Cup khelh theih ve ngei tumin AIFF chuan theihtawp chhuahin hma a la chho mek a. Mizo tel lo chuan India hi a qualify zo lo mai thei! Hmanah chuan India team tur atana koh an nih chang leh, club lian thenkhata trial tura koh an nih ve chang pawhin, lehkha hmuh tlai tih leh a huna thlen hman loh tih te a awm thin a. Tunah chuan inbiakpawhna leh inkalpawhna te a lo awlsawm tawh bawk a, kan ‘hun’ a herchhuak tan chho mek ni pawhin a lang ta. Mizote chu min duhsak lo tih kha kan chhuanlam a ni fo a, tunah erawh chuan Bengali leh hnam dangte sawi dan chuan Mizo an duhsak lutuk tih a ni ve ta thung. Chutiang boruak kârah chuan India ram chhunga football academy tha nia an sawi chanchin tlangpui kan han thur chhuak e.

TATA FOOTBALL ACADEMY :

Tata Football Academy hi Mizote zingah mikhual a ni ta hauh lo mai. Tuna Mizo football star kan neihte hi Tata Football Academy pûm chhuak vek ti ila a dik ang. A chhan chu Mizote chauh a ni lo India ram chhunga football star-te hi an kutchhuak an ni chiang em mai a. India ram chhungah na na na chuan ‘Footballer Breeding Farm’ an lo tih thin hi chu a dik a ni. Mizo zingah S. Malsawmtluanga chu he hmun atanga zir chhuak hmasa ber leh hmahruaitu a ni a, a hnuah Jerry Zirsanga, Malsawma leh Vanlalrova ten an zui a. Anni hnungah PC Lalawmpuia leh Robert Lalthlamuana ten an thlawp zui zat a. Ramluaha leh Malsawmkima te, Henry Gangte te pawh an kutchhuak a ni. Kum 1987 khan Tata Football Academy chuan bul a tan chho a. India ram hmun hrang hranga naupang football talent nei thate, mumal leh awmze nei taka science thiamna hmanga enkawl chunga châwm len leh India hi khawvel hriatthama football khel thiam ram nih tir a ni. India ram chhungah kher chuan an hlawhtling na rawh e. He hmuna football zir chhuakte chu India ram chunga club tha zawng zawngte hian an club-a khel turin an duh vek a. A rîmin an rîm luih luih a ni ber mai. TFA a an awm chung hian group hnihah inthenin junior group-ah kum 14 -16 an awm a, senior group-ah kum 16 -18 an nih thlengin an awm leh a ni. Junior an nih chhung hian stipend-ah zirlaite hian thla tin Rs 500 an dawng a, senior an nih hian Rs.1000 an dawng a ni. Senior-ah an awm hnu hian anmahni tual zawla training chu an duh tawk mang lo a. A tir lamah Brazil-ah an training thin a. A hnu lamah Germany-ah an training ta zawk a ni. TFA-a an awm chhung hian a tawi zawngin sawi ila, footballer-in a zir tur zawng zawng chu an zir a ni deuh ber mai. Tata Football Academy-ah hian naupang kum 14 – 16 te an awm tlangpui thin. Chung zingah pawh chuan an duh dan chuan Subroto Cup leh National Sub Junior (U – 16) lo khel tawhte chu an thlan duh zawngte zingah a tel a ni. Thlan an nih hma hian an zirlai tur te chu tehna chi hrang hrang medical leh physical fitness test te neih a nih hnuah thla thum chhung atan lâk luh an ni phawt a. An tlin hnuah hming an chher a, test chi hrang hrang an neih hnuah technical comitttee chuan mimal tin an ennawn leh a, tling leh tlâk nia an hriatte chu an hnena awm turin an thlang ta thin a ni. Tun thleng hian footballer 680 an chherchhuak tawh a. Heng mite hian India ram club tha zualah an khel deuh zel a ni.

MOHUN BAGAN FOOTBALL ACADEMY

India rama football club hlun leh lian ber te zinga mi Mohun Bagan chuan Football Academy changtlung tak Durgapur W.Bengal ah an din ta. Anni hi India club zingah football academy nei hmasa ber an ni. SAIL (Durgapur) te nena thawk tlângin India ram chhunga thalai football-a talent nei thate tuai hriamna leh chherchuahna ‘pum’ tha tak nih ngei tumin Mohun Bagan te hian an bei a ni.An inremsiam dan chuan Durgapur Steel Plant lam hian infrastucture leh facilities lam an tum ang a, Mohun Bagan lam hian coach te hlawh bakah ei leh in lam an tum bakah an facilities neih, enkawl leh tuaihnûm lam an tum ang. An inremsiamna hi kum ruk chhung atan a ni phawt ang a, chumi hnuah pawh sei leh theih tura ruahman a ni. Mohun Bagan hruaitu pakhat chuan, “Tata Football Academy te chu sumdawng hausa ten an din mai a ni. Keini academy hi chu India ramah chuan football club academy kalphung fel tak nei neia din hmasak ber kan ni ang,” a ti. He academy-a awm tur thlangtute chu football chinchang hria an ni a. Naupang an thlan chhuahte chu thla hnih chhung enchhin an ni phawt thin a. Chumi hnuah chher tlâk leh hmasawn tura an beiseite chu kum 4 chhung awm turin an la thin a ni. He academy-ah hian tunlai thiamna changkang berte hmangin naupang enkawl an ni a, damdawi lam thiamten an ven bakah, naupangte nungphung leh khawsak dan zawng zawngte zir chiang turin mi thiam bik rawih an ni bawk. Swimming Pool leh Gym te nena thuam thlap a ni a, coach leh asst. coach ten a hmunah awm chilhin foreign coach te pawh coaching pe turin sawm an ni thin bawk.

SESA FOOTBALL ACADEMY

He football academy hi Goa state a awm Sanquelim-a bu khuar an ni ve thung a. Tum khatah naupang 30 zel an enkawl thin. An naupang enkawlte tan ei leh in a thlawnin an pe a, football an zir mai piah lamah lehkha zir lam pawh anni chuan an ngai pawimawh hle. An naupang enkawlte chu tualchhung sikulah an kaitir a, kum li an awm hnuah Goan professional club khawi emaw berah lût thei turin theihtawp an chhuah a, chumi a nih loh vek pawhin India club thate zingah an naute chu hnim luh theih ngei an inbeisei a ni. He academy-ah hian Goa state chhunga awm nghet naupang tan chauh hmun a awm a. Chutiang a nih loh vek chuan Goan thisen kai lo tan chuan awm ve theih a ni lo bawk.

CHANDIGARH FOOTBALL ACADEMY

India ram chhunga sawrkar enkawl football academy awmchhun a ni a, sports department-in an enkawl a ni. State lian tak takten a ngaihna a hriat loh laia Chandigarh, (UT sawrkar) in hetiang ngaihtuahna a nei hi fak a phu a ni. He academy hi August ni 7, 2003 khan din a ni a. He academy pianchhuahna atan hmathlir lo nei hmasatu chu Punjab Governor lo ni tawh leh Administrator of the Union Territory of Chandigarh, Lt. Gen. (Retd.) J.F.R. Jacob kha a ni. He football academy hian India ram chhunga football khel thinte hi chungkaw lamah pawh a harsa deuh leh hnuaihnung deuh an ni tih a hrechiang hle a. Chuvangin, an naupang enkawlte chu ei leh inah pawh an duat hle. A tirah chuan, naupang kum 9 – 10 inkarte tan bul an han tan phawt a. Chumi hnuah anni aia kum upa deuh kum 16 hnuai lam an thlang chhuak leh a. Hmasawn an tum bawk a, a kal pawh an kal chak hle. A tlangpuiin he academy hian India chhim lam naupangte an duhsak deuh thin a. An training dan phung pawh scientific deuh taka kalpui a nih avangin Dieticians, Physiotherapist, Doctor, Computer zirtirtu leh Counsellor te an neih bakah Audio Visual facilities tha tak an nei bawk. Football khelh an zirtir bakah an naupang enkawlte chu Government Model High School (English Medium) Chandigarh-ah an kaltir vek bawk a. He academy-ah hian football an zirna chu ngaih pawimawh ber ni mah se, vanduai palh thil thuah hlawhchham ve theih tho a nih avangin lehkha zirna kawng pangngai pawh an ngai pawimawh hle a ni. He academy ah hian SSA Mizoram kaltlangin Mizo naupang a awm mek a. Germany khawpui pakhat Leipzig-ah training neiin an kal thin a.

INDIAN FOOTBALL ACADEMY

Indian Football Association inti ngam ngat W.Bengal ten football academy an siam chu tha ngei ngei tura tlang rin a ni a. He academy hi Indian Football Association leh County Sports Foundation te tang tlangin Durgachak Stadium, Haldia rinchhana an din a ni. India coach neihte zinga foreign atanga degree nei mi tlemte zinga pakhat Mohammed Habeeb, chu chief coach atan an hmang thin a. A thachhangdawltu atan Sujit Chakraborty, football khawvela tawnhriat ngah tak chu hman a ni thung. He academy-ah hian kum thum chhung football khelh zirin an awm ang a, chumi hnuah chuan Calcutta Football League-a club hrang hrangah khel thei tura beisei an ni a. Sum leh pai lam tumtu tur County Sports Foundation te hian a tul a nih phawt chuan an sum an ren dawn lo hle niin an sawi. India football-in hma a sawn dawn a nih phawt chuan theihtawp chhuah an tum a ni. An ei leh in, an thuam thil leh an châkkhai atan kum khatah naupang pakhat tan Rs 1,00,000 zel hmang ral tur anga inbuatsaih an ni. Tata Football Academy te khûm zawk khawpa tan lâk tum an ni a, tan pawh an tang hle. He football academy hi tunlai khawvel thiamna leh changkanna chi hrang hrangte nena thuam a ni bawk.

SAIL FOOTBALL ACADEMY

Steel Authority of India Limited hovin steel khawpui pakhat Bakaro-a an din a ni a. He academy-ah hian Mizo naupang 8 lai an awm thin. He academy hi Bihar state chhunga awm ni mah se, Kolkata football boruak ropui leh hlutzia an naute hriattir an duh avangin Indian Football Association (IFA) hnuaiah an inziak lût a. Tunah hian he academy naupangte hi SAIL hminga khelhtirin Kolkatta Super Divison-ah an awmtir mek a. Din a nih tantirh lama awmte chu tunah hian club tha tak takah an khêl deuh vek tawh a. Chung zingah chuan Venghlui tlangval Lalmalsawma chu India aiawhin vawi duai lo a fehchhuak tawh a. Mizo naupang awm mekte hi he academy tan hian an player rinrawl leh innghahna ber an ni chho tawh a. Beiseina sâng tak nen lo thlir phawt teh ang.
Tin, heng bâkah hian hmun dangah pawh a awm ve neuh neuh a. Williamson Magor Football Academy, Assam ami hi hmar chhakah chuan mumal taka kan neih chhun chu a ni mai awm mang e. Engpawh ni se, heng football academy hrang hrang kan tarlan takah te hian Mizo an awm ve deuh zel mai hian awmze thui tak a nei a, Mizo naupangte hian football-ah talent an neihzia tarlanna pakhat a ni awm e. Tin, heng bakah hian Sport Authority of India-in a enkawl te, Army ho-in sawrkar nen tangruala an enkawlte pawh sawi tur a awm nual bawk.