INDIA RAMA SPORTS DISCIPLINE-TE SUM DINHMUN

India ram National Games chu Hockey a ni a, a dinhmun erawh a tlahniam mek. Cricket in hma a sawn a, han el rual a ni lo. Football in hma sawn hlek hlek mah se, a chuti teh lua rih lo va, Kabaddi-in hma a sawn viau thung.

Sports discipline langsar zual (team a khelh chi) te sum dinhmun tlangpui lo en thuak thuak ila :

Football :
Football League hi thuang hnihin kan kalpui a, mothar chan chan zawk ISL dinhmun a chungnung. Kum 2010 khan IMG –Reliance leh AIFF chuan kum 15 chhung atan Rs. 700 crore in thawhhona thuthlung an ziak a, kum 2025 thleng an thawk dun ang. Mawlmang takin lungthurap chungin han chhut ta ila, AIFF hian kum tin sum hman tur Rs.46.66 crore a nei tihna a ni.

Khawvela infiamna ngaihhlut ber, a khel pawh an tam berna, a lar pawh lar ber atana senso atan chuan a tlem lulai.

Hero I-League Prize money (2017) :
Champion team : Rs.1 crore
Runners-up : Rs.60 lakhs
Third place : Rs.40 lakhs
Fourth place : Rs.25 lakhs

An inkhelh tuma chak zawk apiang ten Rs 50,000 an hlawh ziah bawk.

Indian Super League (ISL):
ISL ah hian team 8 chiah awmin AIFF leh an thawhpui IMG-Reliance ruahman ang chuan kum 7 chhung division hniama tla thei lo tura tih a ni. Heng club te hian kum 3 hnu atang chuan an hlep tan thei tura ngaih niin kum 7 hnuah chuan tla pawh nise an hloh hlepah a chang thei tawh ang tih rilru puin hetiang ruahmanna hi siam a ni.

ISL Prize money (2015) :
Champion : Rs. 8 crore
Finalist : Rs.4 corer
Semi-finalists: Rs.1.5 crore

Cricket :
India ramah na na na chuan cricket han elpha hi an awm rih lo. Indian Premier League (IPL) T20 cricket hian kum 5 chhung atan Rs.1079 crore in kum 2017 atanga thawkho turin Oppo (mobile phone company) nen thuthlung an ziak a, kumtin 215.8 crore hman tur an nei tihna a ni thei ang. Kumtin lawmman Rs.35-40 crore semral a ni thin.

IPL Prize money (2015) :
Champion team : Rs 15 crore
Runners-up : Rs.10 crore
Third place : Rs.7.5 crore
Fourth place : Rs.7.5 crore

*A sang 4 zinga tel pha lo tan team lawmman siam a ni lova, prize money club in an dawn zahve hi player te insem tur a ni bawk.

Kabaddi :
Hei hi chu infiamna muhil ti tih tawh kaihthawh leh a ni. Kumin 2017 atanga hman tan turin club 8 awmna Pro Kabaddi League leh Chinese Mobile Company Vivo chuan inremna thuthlung ziakin kum 5 chhung atan kumtin Rs.300 crore an chhung lut thin dawn. Thlam namthlaka thu chunga chhutin kumtin sponsoreship atangin 60 crore hman tur a nei tihna a ni thei ang.

Pro Kabaddi League Prize money (2016)
Champion : Rs.1 crore
Runner-up : Rs.50 lakhs
Third place : Rs.30 lakhs
Fourth place : Rs.20 lakhs

Hockey : India ramah kum 2013 atang khan Hockey India League kalpui niin sponsorship atangin engzat chiah nge an lakluh/ an hmuh tih hriat a har. Company hrang hrangin an sponsore a, title sponsore-tu erawh Coal India niin anni hian kum 2017-ah Rs.14 crore sengin kum 2018-ah Rs.15 crore an thehchhuak leh bawk ang.

Hockey India League Prize money (2017)
Champion team : Rs.3 crore
Runner-up : Rs.1.5 crore
Third place : Rs 75.00 lakhs

** Khingte khi uluk takin han en vang vang la, AIFF in IMG-Reliance kum 15 chhung zet atan inremna a lo ziahpui hi a fuh chiah em tih ngaihdan i nei thei ngei ang.