Asia U-16 Qualifier khelh mekah India rawlthar rual an che ṭha tluang zel. An match hnuhnung berah Bahrain laka si khat an phur zet hnuin an lehpel leh thei hram a, si hnih si khatin an chak thei ta hram a ni. Match 4 khelh turah vawi 2 an chak tawh a, mumang ramah an cheng mek zel niin a lang a, Bahrain an hneh ṭum hian an hlim tlang aniang dressing room-ah an thawm a ṭha hle a ni. Inkhel ṭan aṭanga minute 20-na lekah Redha Marhoon-a’n Bahrain tan a thun nghal a, hun chanve hmalamah goal a lut chhunzawm lo. Chawlhlawk hmang thiam India Team-in min 52-naah striker Raja Rawat-a’n mawi zetin a ti goal a, hemi hnu reiloteah Daniel Lalhlimpuia box chhungah tihtluk anih vangin penalty hmu lehin Myron Mendes-a’n minute 72-naah a rawn khung a, an chak ta a ni. India hi table-ah a sang ber tawh a, point 6 hlawhchhuak tawh a ni. Inkhel hmasa zawkah Krygyzstan si 7 faiin an lo sawp tawh bawk. Zirtawpni hian Tajikistan nen an inkhel leh dawn a ni.