Kum 1933 – a ‘official’ tak a India ramin international match a khelh atang khan ram tan player sawm (10) in hattrick vawi 12 an lo siam tawh. Heng zingah hian Sunil Chhetri leh Puran Bahadur Thapa te hian India ram leilungah hattrick hi siamin midang pariat hian rampawnah a ni thung.
1) R. Lumsden – Lumsden hi British Indian niin kum 1938 – a India in Australia a tlawh tum khan hattrick hi a siam a ni. September ni 24, 1938 – Royal Agricultural Show Ground, Sydney – a Lumsden a hattrick siam hi Indian football – ah theihnghilh a ni tawh lo ang.
2) Sheoo Mewalal – Bihar a piang Mewalal hi India independence hnua hattrick siam hmasa ber a nih bakah Indian striker tha ber zinga mi a ni.
Colombo khawpuia khelh Quadrangular tournament – ah kum 1952 March ni 16 khan Burma lakah hattrick siamin India chu 4-0 in a chak pui. A vanglai hian club tha leh lar hrang hrangah khelin Bengal tan Santosh Trophy – ah goal 39 zet a thun a, 1951 Asian Games – ah India chu champion puiin top scorer a ni bawk.
(Pic : Sheoo Mewalal)
3) Puran Bahadur Thapa – India rama stadium hmingthang Eden Gardens – ah ngei mai, Pakistan laka hattrick siam hi sawi nep theih a ni lo hrim hrim ! Kum 1954 Quadrangular tournament – ah coach lar Syed Abdul Rahim hnuaia khel Puran Thapa hian December ni 26 khan hattrick hi siamin India 3-1 in a chak pui a ni.
4) Neville D’Souza – D’Souza hi Asian zinga Olympics – a hattrick siam hmasa ber a ni. Kum 1956 Olympics khan Olympic Park Stadium, Mebourne – ah ngei mai Australia lakah hattrick siamin semi-finals – ah India a hlangkai a ni.
5) Marto Gracias – Malaysia a khelh Merdeka Tournament – ah Gracias hian kum 1967 August ni 16 khan Hong Kong lakah hattrick a siam a. Khawchhak chanchinbu lar The Straits Times chuan an chanchinbu infiamna huangah ‘Gracias ! Hattrick for India’ tih thupuia hmangin a thlalak an dah hial a ni.
6) Subhash Bhowmick – East Bengal leh Mohun Bagan coach hlui hi coach angin lar hle mahse India tan hattrick a lo siam tawh tih hi hriat lar a ni lo fo. Asian Games bronze medallist Bhowmick hian kum 1971 Merdeka Tournment – ah khan Philippines lakah hattrick a siam a ni.
7) Magan Singh Rajvi – India captain hlui Magan Singh hian kum 1974 Mederka Tournament – ah Thailand lakah hattrick a siam a. India tan game 33 khelin goal 15 a thun a, Arjuna Award a dawng tawh bawk. A u Chain Singh Rajvi pawh hi India international player hlui tho a ni.
(Pic : Magan Singh Rajvi)
8) Shabbir Ali – Kum 1970 leh ’80 chhoa India striker tha ber tih ngam chu Shabbir Ali hi a ni. India tan game 72 khelin goal 23 a thun a, kum 1976 Merdeka Tournament – ah khan Indonesia lakah hattrick hi a siam. Football huang atanga infiamna lama chawimawina sang Dhyan Chand Award dawng thei pahnih zinga a hmasa zawk a ni.
9) I M Vijayan – Indian football chanchin a striker ropui ber zinga mi IM Vijayan hian India tan game 79 khelin goal 40 a thun a, heng zingah hian 1999 South Asian Federation Games – a minute 19 chhung leka Pakistan laka a hattrick siam pawh a tel !
Arjuna Award dawng tawh, Indian Player of the Year atana vawi thum thlan hmasak ber Vijayan hi ‘India’s first football superstar’ an tih thin kha a ni.
10) Sunil Chhetri – Chhetri hian rampawnah hattrick la siam lo mahse India player zinga hattrick vawi thum la siam awmchhun a ni. Kum 2008, 2010 leh 2010 te khan Tajikistan, Vietnam leh Chinese Taipai lakah hattrick te hi a siam a, heng inkhelah te hian India a chak pui vek bawk.
