India U-16 team te chu AFC U-16 Qualifying khel turin Tashkent, Uzbekistan-ah an zin thu leh an chet that thu pawh kan sawi lang nual tawh a mahse mumal takin an qualify dan hi kan la ziak lova. A tlangpui i lo ziak dawn teh ang. Sawi tawh angin India team te hi Group C-ah Uzbekistan, Tajikistan, Bahrain leh Krygyzstan te ho nen an awm ho a. Group C bik hian Oct 1 – 9 chhungin qualifying match hi an khel a ni. India team ah hian Mizo rawlthar 4 ngawt an tel a. K.Lalramzauva, Lalrammuana, Daniel Lalhlimpuia, Vanlalduatsanga te an ni. Lalramzauva phei hi chu Captain a ni nghe nghe.

India team hi IMG Academy, Florida, USA ah training neih pui an ni a, hemi hnu hian Goa ah, Youth Development Head Coach, Colm Toal hnenah training an nei leh a. An kal dawn hian Conscient Football, Heritage School Ground, Gurgaon ah an camp leh a ni. Training tha tak nen a inbuatsaih an nih avang hian beiseina an nei sang hle a.

 India 7 -0 Krygyzstan @ Oct 1

An match hmasa berah hian Krygyzstan an tum a. First 11 ah Mizo rawlthar pahnih ngawt an lut a. Minute 5 lekah Sikkimese rawlthawr Uttam Rai chuan goal a thun nghal a, minute 7,45,55,85 ah te thun lehin goal 5 ngawt a thun a ni. Mizo rawlthar Daniel Lalhlimpuia paw’n minute 17 & 42 ah goal thunin, goal 2 a thun ve a. Hemi te pahnih hi tun atanga kum 10 ah chuan India Striker tha ber an ni lovang tih a sawi theih miah loh a ni.

1^st half a zawh meuh chuan 5-0 ngawtin India hian hma an hruai a. 2^nd half ah hian Mizo rawlthar Lalrammuana leh Vanlalduatsanga te an rawn lut ve bawk a ni. Hun a tawp meuh chuan India hi 7-0 in an chak a ni.

Scorers : India (Uttam Rai – 5’,7’,45’,55’,85’ & Daniel Lalhlimpuia 17’,42’)

Squad: Supratim Bhattacharjee, Myron Mendes, Suman Saha (Nabin Rabha – 81’), Sajid Dhot, Sarthak Golui, Nitin Jyal (Lalrammuana – 51’), Raja Rawat, Hermanjot Singh, Lalramzauva (C), Uttam Rai, Daniel Lalhlimpuia (Vanlalduatsanga – 65’)

 India 2-1 Bahrain @ Oct 3

India hian an match hmasa berah Krygyzstan 7-0 ngawtin sawp mah se Bahrain erawh team tha an ni tih an hria a, an fimkhur hle a. Minute 20-na lekah Redha Marhoon chuan Bahrain tan a rawn thun nghal a, game pawh a tang chho khawp mai. 2^nd half ah India hi an rawn tang khawp mai. India lam hian half time hi an hmang tangkai bik a ni ngei ang, minute 50-naah Raja Rawat chuan India tan goal a rawn thun nghal a. Minute 54-naah Daniel Lalhlimpuia chu box chhung a an tihtluk avangin India hian penalty an hmu a, Captain Lalramzauva chuan crossbar a pet per a, a goal lo hlauh. Mah se minute 72-ah India hian penalty an hmu leh a, tun tum erawh penalty pet turin Myron Mendes a rawn pen chhuak a, India players leh fans te an zam hle. Mah se goal pawimawh tak, chakna goal ni bawk chu a rawn thun a. India hi mumang ramah an cheng a, hun a tawp meuh chuan India hi 2-1 in an chak a ni. Tihian India hi group leader niin AFC U-16 Championship qualify-na chance a sang ta hle a ni.

Scorers : India ( Raja Rawat – 52’, Myron Mendes(P) – 72’) & Bahrain (Redha Marhoon -20’)

Squad: Supratim Bhattacharjee, Myron Mendes, Nabin Rabha, Sajid Dhot, Sarthak Golui, Nitin Jyal (Lalrammuana – 53’), Raja Rawat, Hermanjot Singh (Suman Saha-90’), Lalramzauva (C), Uttam Rai, Daniel Lalhlimpuia (Vanlalduatsanga – 77’)

 Uzbekistan 9-0 India @ Oct 5

Krygyzstan leh Bahrain hneh zo hlim an ni bawk a, inrintawkna sang tak an nei a. Match tantirh phat atangin an innawr tawn em em a, a tir minute 18 chhung hian India hian goal chance vawihnih ngawt an missed a, Uttam Rai leh Harmanjot Singh te khan missed ta lo se chuan Uzbekistan hian India hi an sawp bik kher lo mai thei a ni. Minute 18 lekah Uzbekistan tan Abbasov Shohiahon chuan a rawn ti goal a, heta tang hian India game a buai chhova, home team an lo ni bawk nen Uzbekistan game a tha chho tulh tulh a, India an tal buai zel a, minute 25,26 leh 29 ah Odilov Mukhiddin chuan ti goal in, hat-trick a rawn siam der mai a. India game a chhe tual tual a, half time a nih meuh chuan 6-0 a ni der ta mai.

India tan beisei tur a awm tawh lova,  Abbasov Shohiahon paw’n goal 4 ngawt a thun a. Abdullaev leh Miravez Alisher te cuan goal 1 ve ve an rawn thun belh a, hun a tawp meuh chuan Uzbekistan hian 9-0 ngawtin India hi an sawp a ni. Coach Thomas Joseph chuan Uzbekistan chu team tha zawk an nih thu leh chak an phu zawk thu a sawi a. Inkhelh zawh hian players te pawh an ngui hle a, dressing room leh bus ah pawh tumah an tawng lo a ni. Kan last match hi a pawimawh dawn hle a, chak kan tum a ni tiin a sawi bawk.

Scorers : Abbasov Shohiahon (18’,45’,60’,68’), Odilov Mukhiddin (25’,26’,29’), Abdullaev (40’) & Miravez Alisher  (67’)

Squad: Supratim Bhattacharjee, Myron Mendes, Nabin Rabha(Vanlalduatsanga – 77’), Sajid Dhot, Sarthak Golui, Nitin Jyal, Geremsha Basumatary  (Suman Saha -45’), Hermanjot Singh (Suman Saha-90’), Lalramzauva (C), Uttam Rai, Daniel Lalhlimpuia

 India 4-1 Tajikistan @ Oct 7

He match hi a pawimawh hle a, a chhan chu Tajikistan hian point 4 an hmu a, India erawhin point 6 an hmu thung. Mah se Tajikistan hian India hi an hneh a, an last match ah Uzbekistan an hneh hlauh chuan India hi an tla daih ang a, Tajikistan hi an lut thung ang.  Chuvang chuan team 2 tan hian match pawimawh tak a ni. Inkhel tan tirh atang an innawr nghal a, minute 16 na lekah Tajikistan hian penalty an hmu a, Komron Tursonoy chuan rawn pet goal in, tun dinhmunah hi chuan India hi tla thei an ni a ni. Hun rei a ni lo, Mizo tlangval, Captain ni bawk Lalramzauva a rawn lang ta ! Free kick atang minute 24 na ah goal pawimawh tak a rawn thun a. India an him ta, mahse hun a la tam a, inthlahdah thei an nilo tih an hria. An tang chhunzawm zel a.

India game a tha chho telh telh a, ‘The New Bhaichung’ ti a media te’n a an sawi tawh, India goal thun khawl Uttam Rai a rawn che a, minute 42 leh 61 ah goal a rawn thun a, India hi hmun himah a rawn hlangkai ta a ni. Hun tawp dawnah Daniel Lalhlimpuia chuan goal 1 dang a rawn thun leh bawk a. Tihian India chuan  2012 AFC U-16 Championship chu an qualify ta a ni.

Scorers : India (Lalramzauva – 24′, Uttam Rai – 42′, Sarthak Goluj -61′, Daniel Lalhlimpuia -90′ & Tajikistan (Komron Tursonoy(P) – 16′)

Squad: Supratim Bhattacharjee, Myron Mendes, Nabin Rabha (Suman Saha-63’), Sajid Dhot, Sarthak Golui, Nitin Jyal, Raja Rawat, Hermanjot Singh (Allen Deory -29′), Lalramzauva (C), Uttam Rai, Daniel Lalhlimpuia

Engtinnge India hi an qualify theih

Zone 2 – West (22) leh East (18) ah then an ni a. Group 7 ah then ni lehin group khat ah hian team 6 leh team 5 an awm leh a.  A sang pahnih te hi an tling ang a. Tin, Group tin atanga 3-na, point hmu sang pahnih te pawh an lut thei bawk ang. India hian Uzbekistan hnehlo mah se group ah pahnihna an ni a, an qualify ta a ni.

A host tur hi tihchian a la ni lova, Iran leh Palestine te’n thlen an dil ve ve a. AFC Competitions Committee chuan a host te hi an qualify ngei tur a ni a tih avangin tunkum November ni 21 hian a host tu tur hi an rel dawn a ni.

AIFF a lawm

AIFF chu U-16 team te’n AFC U-16 Championship an qualify avang hian a lawm hle a. AIFF chuan players leh staff te chu  Rs. 25,000 theuh a pek tur thu a sawi a ni. AIFF President leh General Secretary te paw’n players bakah Youth Development Head Coach, Colm Toal hnenah lawmthu an sawi a. India future tur an nih avangin an hmabak a eng a, a tul ang a hma an lak zel tur thu leh an hma hun atan duhsakna an hlan thu an sawi nghal bawk a ni.

Duh duh sawi ang

Kan tarlan ang hian players te chu  Rs. 25,000 chauh pek an ni a, Indian Football ah hi chuan pawisa hi chu a la tlem deuh a ni. Cricket chu ni se a nuai tel an pe leh awm bik si a. Cricket leh Football hi chu India ramah chuan tehkhin chi pawh a la nilo. Mah se India Football hma pawh hi a eng chho ve zel e.

U-16 team ah hian kan Mizo rawlthar Lalramzauva chu captain a ni a, Mizo te hi football ah hian kan future a bright em em a. Tinge age level ah hian kan tha em em a, senior level ah hian engmah kan nih leh si loh tih hi zawhna lian tak a nih ka ring. Mah se hei tunah Jeje-a, Rindika, Robert-a te kan nei a. Anmahni vang pawh Mizo nih pawh a nuam chho tan viau e. Mama, Jerry-a leh midang football-a sul sutu tam tak te pawh hi sawi hmaih chi an niin ka hrelo. Kan footballer dang te pawh ka fuih duh a, nagmahni vang hian Mizo nih hi nuam kan ti a, hei aia nasa hian tan han la teh u, National team ah hian Mizo vekin kan la khel thei tih hria ila.

Zofooty Players to watch

Zofooty chuan U-16 team ah hian Uttam Rai hi tha kan ti khawp mai. Best player ah kan thlang a ni. Uttam Rai hi Sikkimese a ni a, mi tam tak chuan The New Bhaichung Bhutia tih hialin an sawi tawh a ni. IMG Academy, Florida, USA-a an training lai pawh khan ‘Player of the Year’ ah thlan a ni.

Captain Lalramzauva pawh hi zofooty chuan tha kan ti khawp mai. Team a ho thiam a, Leadership quality a nei tha, goal a khung theiin goal pawimawh tak tak a khung fo a ni.