Thu Post zirna ni pahfawmin aw ni ang. Kum 2022 World Cup thlengtu tur leh Hamara Desh ten Friendly an khelh tur hi TV lamah en tur a awm leh hmel si loh a. Chuvangin “I hmelma chu hre chiang rawh” an tih thin angin hre chipchiar lo mah ila Qatar Team te an tun dinhmun tlem a zawng tarlan ve tha in ka hria a, ka rawn chhawp chhuak e. (Indian Team dinhmun chu kan chiang ve thawkhatin ka hria, ka tarlang tello mai.)

                Hmanni lawkah India vs Qatar ten a Olympic Qualifier an khelh kan hmu a. Naktuk maiah hian Senior Team te nen kan in khel leh dawn a ni. Qatar te hi FIFA World Ranking ah 94 na an ni mek a, AFC ah chuan 9 na an ni(AFC ah India- 26 na).World Cup Qualifier a India in UAE an khelh dawn laiin Qatar hian Vietnam an khel ang. Kum 2011 Asian Cup thleng tu te hian an Coach atan Serbia mi Milovan Rajevak an hmang a. A ni hi Kum 2010 World Cup a Ghana team te Quarter Final hruai thleng tu kha a ni. A ni hian Bruno Metsu kha kumin February thla khan a thlak a ni. Qatar Senior team te hi Senior International ah Match khat chiah ala khelh pui a. March thla khan Russia nen Friendly Match ah 1-1 in an in tha then a ni.

 World Cup Qualifying match Vietnam nen an in khelh tur atan hian ram hausa an ni bawk nen an inbuatsaih tha thawkhat viau in a hriat. Evian, France ramah training neiin, training an zawh hnu hian Warm Up match an khel zui a. Morges, Switzerland ah Swiss club FC Laussane nen inkhelin 0-3 in an chak lo a. Arco, Italy ah German club Bayern Munich nen inkhel lehin hetah hian 2-4 in an chaklo a ni. He match ah hian Van Buyten, Thomas Muller, Nils Petersen leh Ivica Olic ten Bayern tan an khung nghe nghe a ni. An match hnuhnung ber chu Swiss Super League Club Neuchtal Xamar FC nen khelin 2-2 in an in draw a ni.

                 Key Players :

                i) Bilal Mohamed (Defender) : He pa hi kum 2011 Asian Cup a an Captain kha a ni. Kum 2006 Asian Games Football a Iraq an hnehna goal khungtu kha a ni nghe nghe. Defender rorum, che rang leh chak tak a ni a. Khelmual chhungah leh pawnah Leadership a nei tha hle bawk.

                ii) Fabio Cesar Montezine (Midfielder) : He pa hi Qatar Team ah chuan a  upa pawl niin a experience neih that hi an chhawr khawp mai. Brazillian rama piang a ni. Asian Cup 2011 ah pawh khan goal 2 a khung nghe nghe. A movement leh passing tha lutuk hian Indian Midfielder te  tan harsatna a siam thei a ngem?

                iii) Sebastian Soria (Striker) : Qatar Goal Machine an tih mai Soria hi Uruguay rama piang a ni a, Technically gifted player ti a Qatar chanchinbu ten an sawi thin a ni. Kum 27 a upa a ni a, European Tour ah pawh goal 2 a khung a, Bayern Munich lamah pawh a khung nghe nghe a ni.

Kim changlo takin ka han tarlang a ni a. Mi ram dinhmun ngaihtuah chuan khawvela mihring tam berna dawttu hian Football ah hmasawnna tur tam tak kan nei tih a lang chiang zual hle a ni. Qatar an chak zawk chu kan ring sa theuh awm e. Mahse, Jeje-a hi tha takin khel se tih hi duhthusam a ni. Indian Team a Mizo awm te a bik takin duhsakna sangber he post hmang hian ka hlan e.