Indian football – a rawlthar duhawm ber te zing a mi Anwar Ali chu a hriselna dinhmun that loh avanga AIFF – in inkhelh a phal loh chungchangah Delhi High Court – ah a zualko.
Tarlan tawh angin kum 20 a upa hriselna chungchang hi AIFF Sports Medical Committee chuan ngaihtuahin “football khelh chawlhsan rih” turin AIFF leh AFC – ah rawtna an thlen a, AIFF hian tunhnai khan a club khelhna Mohammedan SC – hnenah lehkha thawnin Anwar Ali hi training zawm tir lo turin an ti a ni.
“Committee hian thu mum engmah nei loin a inkhelh an phalsak lo ringawt a, a inkhelh loh chuan inchawmna tur a nei dawn si lo. AIFF Constitution hnuaia he Sports Medical Committee din a nih dan pawh hi a dik lo a, Anwar Ali chunga an thil tih dan vel hi a buai chuarin a mumal lo hle a ni. Doctor pahnih chuan a inkhelh theih thu an sawi a, doctor thenkhatin inkhelh an phal lo thung a. Tu doctor ber hi nge rin tur hriatthiam a harsa a, AIFF in inkaihhruaina a neih hian a huam kim tawk lo hle a ni,” tiin Anwar Ali ukil Amitabh Tewari chuan a sawi a, club in an chhawr duh a nih phawt chuan Federation hi an lo inrawlh ngawt thei lo a ti bawk.
FIFA U-17 World Cup – a India player Ali hi Mumbai City FC tana a khelh laiin a lung lam fel lo hi hriat chhuah a ni a, nikum khan India coach Igor Stimac hian France rama University Hospital of Rennes – a Sports Medicina lama an hotu Dr. Francois Carre pan turin a rawn a, chutah chuan ‘hah takin a inkhel a nih chuan heart attack neihna chance sang tak’ a nei niin an hmuchhuak.
Hemi hnu hian India ramah rawn haw in training a chhunzawm a, Jalandhar, Punjab – a lung lam doctor (cardiologist) hnen atangin fitness certificate a la a, Mohammedan hi a zawm ta tho a ni. Kolkata club hian cardiologist rawn ve lehin a thisen test a nih bakah CT Scan leh MRI tih a ni bawk a, ‘a dinhmun hian that lam pan mahse heart attack vanga thi thut thei’ a nih thu tarlan a ni a, AIFF hnenah kal lehin tun dinhmun hi an thleng ta a ni.
“Vawi tam tak test a ni tawh a, ramchhung leh rampawn doctor thiam thlengin rawn an ni tawh. Kan rawlthar te zinga talent tha ber pawl a ni a, dam takin inkhel thei se kan duh ngawih ngawiha mahse a hriselna in a tuar erawh kan phal lo. A tul a nih phawt chuan a eizawnna tur kawng dang dap kan inhuam a ni,” tiin AIFF General Secretary Kushal Das chuan a lo sawi tawh.
