Baichung Bhutia chuan, “I League kan khelh hun nen a innan buai loh phawt chuan ka lo kal ang,” tiin Mizoram Premier League hawnnaa tel tura ka sawmna chu min chhâng a, a sawi zo hman awrh tihah Delhi-a TV news channel hrang hrangin an bawr luih luih a, “Nakinah kan inbe leh dawn nia…,” a ti ta ringawt a!

August 21 zan khan New Delhi-ah All India Football Federation Platinum Jubilee lawm a ni a, AIFF-in kum 75 a tlin a lawm rual hian Indian football-a thil theihnghilh tawh ngai loh tur, Indian Football Master Plan chu AIFF Technical Director Rob Baan-a’n a pholang.

He hunah hian AIFF hruaitu, state tina football association hruaitu, Indian footballer ropui thlan khawm, football-a India tana thawhhlawk deuh deuh (players, coach, referee etc), AIFF sponsor-tute leh sawm bik mi pawimawhte an fuankhawm a, a hmun chu New Delhi-a an hotel ropui Taj Palace-ah a ni a, MFA aiawhin president Lal Thanzara nen kan tel.

August 22 chhunah AIFF Special General Body Meeting kan nei a, zan lamah Nehru Cup hawnna inkhel kan en bawk.

Kum 75 chhuanawm?
AIFF-in kum 75 a tling ta a, India chu FIFA ranking-ah a hniam lai ber a ni a, 168-na a ni a, tun hmain hei ai hian a la hniam ngai lo.

AIFF president leh Union Minister Praful Patel-a’n a sawi thiam a, ‘AIFF-in a hun thim ber leh a hun harsa ber a pal tlang tawh a, tunah chuan hmabak êng tak a nei a ni,’ ti zawngin a kai her daih.
Ni e, kum 75 chhungin AIFF hian chhuan tur a nei tam lo. AIFF din hma, West Bengal-a IFA an din tirh lam kha chuan chhuan tur a nei nual a, khatih hunlaia British team an hneh dan te, Asia rama football club upa ber Mohun Bagan an din dante kha chu a chhinchhiahtlak.

Kolkata derby ropui tak, khawvel pawhin mak a tih khawpa entu an ṭhathnemna pawh he India ramah ngei hian a awm thei a, hengte hi khawvelin Indian football-a a ṭha zawnga a hriatpui chu a ni deuh mai!

Asian Games-a gold medal ṭum hnih a lo lak tawh hi Indian football-a chhuanawm ber chu an ni mai a, AIFF lam pawhin kum 1951 leh 1962 Asian Games-a gold medal latu la damte chawimaiwna hun August 21 zan hian a nei a, Indian football-a mi ropui Chunni Goswami leh PK Banerjee-te pawh an lo tar ve ta.

Thusawi ngaihnawm chu
Praful Patel hi chu thusawi a thiam ve hrim hrim a, a duh tawka football chanchin a sawi chu a ngaihnawm hle.
Union Minister hna aiin state inang lo tak taka football hotupa nih chu hna a harsat thu a sawi teh mauh a, football ngaina leh thiam tak state-te leh football ngaina miah lo state-a football chawisan dan tur ngaihtuah chu har a ti ve a ni! A thusawi tawp lamah Northeast aṭanga footballer ṭha an chhuah nasat thute a sawi a, politician a ni bawk a, tunlai boruakah Northeast lam ṭhatna a sawi uar thiam hle.

AIFF General Secretary Kushal Das-a’n football inrelbawlna atan theihtawp an chhuah dante a sawi a, FIFA-in AIFF a duhsak dante leh ṭan lak zel tuma hmachhawp an neihte a sawi.

Thusawitu dang an awm tawh lo a, Baichung leh Chunni Goswami-te’n souvenir an tlangzarh a, a bak chu jubilee lawmna zai, lam, ei leh in lamin a zawm.

The Master Plan
Hei zet chu football ngainatute tan chuan thil lawmawm a ni – Australia tana football master plan duangtu Dutch football expert Rob Bann a lo ding a, ‘Indian Football Master Plan’ a duan chu a pho chhuak ta.
Rob hian a thil duan hi India ram state hrang hrang a tlawh hnu, footballer leh coach, referee leh media lamte a dawr kual hnu, Indian football history a zir chian hnu, Indian football dinhmun a theihtawpa chika a bihchian hnua a duan a nih thu a sawi.

AIFF aṭanga state FA thlenga an tih tura a duhte a sawi a, training dan thar, coaching dan thar, referee-te awm dan turte leh inkhelh dan thar thlengin a duang. Rob chuan, “Ram dang inkhelh dan etawn ve ringawt tur a ni lo a, Indian footballer tan eng hi nge ṭha ber kan duang chhuak tur a ni… ram hrang hrangin khelh dan bik an nei a, India pawhin khelh thiam dan bik kan nei ngei ang a, chu chu kan zir chhuak tur a ni,” a ti.

A thutlangkawmna atan Rob chuan, “Nakinah chuan World Cup-ah India leh Australia an la inkhel ang a, anni pahnih hi football-a hma an sawn theihna tura master plan ka duan anga kal ve ve an ni…. chutah chuan kei chu tiang hawlin putar mai ka lo ni tawh ang…,” a ti a, rilru a khawih hle…

‘Ka’ thil tawnte
Thih hnua ‘mahni chanchin’ la sawi ṭheuh tur ni si damlaia ‘mahni chanchin’ sawi hi kan châk viau hlawm bawk a, ‘mahni chanchin’ ka’n sawi ve teh ang!

Indian football-a mi pawimawh rual nen hotel khatah kan thleng khawm a, Kolkata football-a an mi thiltithei tâwpthang Anjan Mitra (Mohun Bagan hotupa) nen kan inkawm a, Mizorama Bagan team lo zin dan tur kan sawi nual a, pawisa kan neih loh avangin anmahni pawisa ngeia zin turin ka sawm!

Baichung hi chu kan inkawm zauh zauh tawh a, tui takin kan titi a, United Sikkim din a hautakzia leh season tharah an beisei ang sum an neih loh vanga a player ṭhate’n an chhuahsan thu a sawi a, I League-a inhamtan ngawr ngawr chu an tum ber a nih thu a sawi.

FIFA Development Officer Dr Shaji Prabhakaran, Indian football-a ‘professional ber’ an tih Pune FC lama an hotupa Chiraj Tanna, Indian football-a mi thiltithei zinga mi Henry Menezes-te nen kan inkawm a, hei bakah hian East Bengal, Chiraj United, Salgaocar etc lama an hotute pawh ka titipui nual a, Shillong Lajong neitupa leh ka ṭhianpa Larsing Ming nen kan inzui chawt bawk.

Heng zawng zawng ka sawi duah chhan chu hei zawk hi a ni – heng mipawimawh leh hausa rual, player hlawha cheng vaibelchhe tam tak hmang ṭhinte tan Mizoram FA hi pawimawhna nei tham lo tur kan ni a, anni chuan ‘crore…’ tih lam an sawi a, keini kum khata cheng nuai 20 tling lo budget nei MFA aiawhte min kawm ve duh tlat – kan footballer-te vang a ni.

Footballer kan nei ṭha miau a, I League club hausate leh AIFF ngaihah Mizoram hi a tê thei lo a, president Praful pawhin, “Mizoram chu in active hle tih ka hria,” tiin min hrilh tawh a, AIFF office-a thawktute leh Rob Baan-te thlengin Mizoram FA aiawha kal ta chu min kawm a, kan titi ve reng thei a ni.

India hi football khawvelin ‘market’ angin a hmu tawh a, European club lian an lo kal zel ang a, FIFA pawhin a ‘duat’ deuh deuh ang a, AIFF pawh a insiam ṭha zel ang a, Mizoram aṭangin football-a eizawng mai ni lo, football vanga hausa hi kan la awm dawn chauh a ni – tunah pawh an awm tawh e! Vai kan tih mai hi kan tam hneh dawn lo a, thiamna lamah kan tluk hleithei lo a, a ṭha zawnga intihsiaknaah tluk harsa tak an ni – football-ah erawh chuan tih tak taka kan beih chuan kan tluk thei ang – an sum sen zat sen tur nei phei ila India ramah ro kan rel thei ang.

Rob Baan-a thusawiin tlangkawm ang – India coach Wim Kovermans nen kan pathumin kan ding a, Kovermans-a hnenah Mizoram chanchin hrilhin, “Hotel ṭha ber an nei lo a, khelmual ṭha ber an nei lo a, training-na hmunhma leh hmanrua an nei lo a, veivahna changkang ber pawh an nei lo a; nimahsela he state hian talent an nei ṭha ber a ni,” a ti.

Admin : Kan ngenna leh kan dilna anga a article phal taka min chhuah chhawn tir avangin ZoFooty Team chuan Mizoram Football Association Honorary Secretary Pu Lalnghinlova Hmar (Tetea) chungah lawmthu kan sawi e