INDIAN SUPER LEAGUE : MIZORAM PLAYER TE’N STATE PAWN ATANGIN SUM LALUT HNEM DAWN

Vawiin khan Mumbai khawpuiah Indian Super League Season 4 atan player te zawrhchhuah an ni a, zawrhchhuah zingah Mizorama cheng football 14 in club thar an nei dawn.

Mizote chauh kan ni lo, football khawvelah hian sum hian thil a ti theiin a pawimawh hle a, a pawimawh ber erawh a ni kher lo maithei. Chutih rual chuan footballer te hlawh zat hi an career-a thil pawimawh tak a nih avangin miin an hre chak viau thin.

Vawiin a club thar nei Mizorama cheng footballer 14 te leh kum khat chhunga an hlawh tur zat chu kan hre deuh thum tawh na in han tarlang leh hrim hrim ila :-

Lalthuammawia Ralte – Nuai 37.5

Lallianzuala Chhangte – Nuai 15

Lalruatthara – Nuai 25

Sena Ralte – Nuai 27

Lalchhuanmawia Fanai – Nuai 45

Lalrindika Ralte – Nuai 50

Robert Lalthlamuana – Nuai 25

Isaac Vanmalsawma – Nuai 15

Lalthakima – Nuai 10

Sairuatkima – Nuai 8.4

Zohmingliana Ralte – Nuai 25

Jerry Mawihmingthanga – Nuai 25

Lalrempuia Fanai – Nuai 8

Lalchhawnkima – Nuai 20 te an ni.

An zavaia an hlawh tur belhkhawm hi cheng nuai 335.9 zet a tling ! Anni bakah hian ISL club te’n player draft hmaa an lo biak fel tawh Jeje Lalpekhlua, Daniel Lalhlimpuia, Jerry Lalrinzuala leh Malsawmzuala Chhangte te an awm bawk. Jeje a hlawh tur zat kan hre tawh a, Sawmtea hi Bengaluru FC nen nuai 12 velin an inrem a nih hmel a, Daniel-a hi player dangte nen an chelh dan a inan loh deuh avangin a hlawh tur zat sawi lan a ni lo. Jerry Rinzuala hian Chennaiyin FC – ah contract thar ziak lo in a contract neih lai a ring tlang a, a hlawh a pung lo niin a lang bawk.

Tichuan ISL Season 4 a inlan tur Mizoram chhuak footballer te hlawh tur zat belhkhawm hi a tlem berah nuai 490-500 tal chu a ni ngei dawn niin a lang. Chu chu chawhrualin mi pakhatin kum khatah cheng nuai 27.66 hlawh ang an ni a, thla khatah chuan cheng nuai 2.3 vel a ni.

An hlawh dawn turah hian ‘cut’ neuh neuh a awm turah ngai ila, chutih rualin ISL-ah ngat phei chuan match khat khelh thatin lungkhawng a nei viau niin a lang. ISL mai bakah I-League lamah Mizo footballer engemawzat an awm dawn niin a lang a, heng mite nena an hlawh belkhawm phei chuan kan footballer te hian savun hampuar hmangin state pawn atangin sum an va thawkchhuak hnem tehlul em !

Footballer te tan hian sum eiruk hi thil har tak tur a ni a, an thawh loh hlawh an la ve ngai lo. An hlawh tamzia kan sawi a, TV-ah kan hmu a, kan ngaisang a, a lawmawm. Chutih rual erawh chuan hetiang dinhmun thleng tura an thawhrimna leh insumtheihna te, an huaisenna leh tumruhna te, harsatna leh lunglenna karah pawh an beih tauh tauh avang chauha tun dinhmun hi thleng thei an ni tih hi mipui pawh hian hre nawn leh ila. A nuam lai chauh emaw an hlawh tam lai chauh hi entawn lo in an hlawhtlinna tura an beih nasatzia hi entawnin kan thiltihna theuhah a bik takin thalaite hian Pathian hre reng chungin “Thawhrim hi hlawhtlinna” a ni tih hre rengin i bei sauh sauh zel ang u.