Nimin tlai kha EURO 2012 Squad thehluh hun hnuhnung a ni ta a. Player khel thei tur zawng zawng hi 276 an nih laiin mi ṭhenkhatte erawh chu inhliam vangin squad-ah koh tel an ni ta lo a ni. Mi ṭhenkhat langsarzual 10 i han thlir ho teh ang.

1. Eric Abidal(France):
Abidal hi kan hriat ṭheuh angin April thla khan a thin thlak(liver transplant) a ni a, Coach Laurent Blanc-a tan chuan a uihawm hle a rinawm, hetihmek lai hian Tottenham a khel Younes Kaboul pawh a khup ná vangin koh a ni ta lo bawk.

2. Gareth Barry(England):
Kum 31 a upa Gareth Barry hian hmanni lawk khan English Champions an nihna lawmin hun an hmang a, hmabak eng tak neia EURO khelh a tum mék laiin Norway nen friendly an khel ṭumin a dul tihrawl a ṭet hlauh a, hei vang hian a khel thei dawn ta lo a ni.

3. Dmytro Chygrynskiy(Ukraine):
Shakhtar Donetsk defender, Barcelona tana lo khel tawh Chygrynskiy hi malpui ná a neih vang leh coach Oleg Blokhin-a’n hun a pek chhunga a dam hman loh vangin koh tel a ni lova, an keeper rinrawl ber Andriy Dikan pawh khabe ruh tliak vangin a khel lo bawk ang, Oleksandr Shovkovskyi pawh dar tha ná vangin a khel thei dawn lo bawk a ni.

4. John Guidetti(Sweden):
Manchester City aṭanga Feyenoord-a loan a khel mek Guidetti hi a malpui dinglam nerve a ṭhat loh vangin a khel thei dawn lova, centre back Daniel Majstorovic pawh a khup thá dik loh vangin a kal thei dawn lova, West Brom player Jonas Olsson-a’n a hmunruak a hnawhkhat dawn thung.

5. Erik Pieters(Netherlands):

Giovanni van Bronckhorst a chawlh hnua amah thlak zo ber tura ngaih kum 23-a upa Pieters hi RKC nen April thlaa an intum ṭuma a ke a tihnat vangin koh tel a ni ta lova, a aiah PSV-a a teammate tho Jetro Willems koh a ni a, tawnhriat ngah lo zawk a nih vangin Dutch ho defence veilam chu a phui ṭha tawk lo maithei.

5. Carles Puyol(Spain):

European Champion nihna an vawnhim theihna tur atana a venhim lam hna thawk tura awhawm leh rintlak ber pawl Barcelona Defender hi hmanni lawk khan a khup zai a ni a, hei vang hian tournament hi a khel thei dawn ta lo a ni.

6. Giuseppe Rossi(Italy):

Rossi hian nikum October thla khan Real Madrid nen an intum ṭumin a khup tha a tihthler vangin season khat deuh tawp khel ṭha mumal lovin a awm a, a damfel hnu lawkah April thla khan a tina leh a, thla 10 chhung a chawlh a ngaih phah dawn ta a ni.

7. Bacary Sagna(French):

Abidal leh Kalou-te khelh theih loh tur kan tarlang tawh a, Sagna pawh a keruh tliak vangin a khel thei dawn bik lo. French tan chuan thu lawmawm lutuk a nih hmel loh.

8. David Villa(Spain):

Coach-in hun tawp thleng ka nghak ang a ti a, mahse a dam hman tak loh vangin Villa pawh hian inlum aṭangin a ṭhiante khel a en mai a ngai tawh dawn a ni. Villa hi qualifying-ah a che ṭha hle a, Spain all-time record goalscorer a ni hial a, mahse tournament takah a khel thei leh dawn ta si lo a ni. Hei hi Spain ram tan chuan channa lian ber a ni maithei.

9. Kyle Walker(England):

Tottenham Right-Back, Premier League Young Player of the Year lawmman dawngtu hian an League match hnuhnung berah Fulham nena an inkhel ṭum khan a kezungṭang a ti tliak a, hei vang hian a khel thei dawn lova, Chris Smalling pawh a ṭhal ná vangin a khel thei lo bawk ang. Hei vang hian the Three Lions chuan hun reilotea star player ni thei mai tur pahnih a chhawr thei dawn ta lo a ni.

10. Jack Wilshere(England):

England rawlthar, ram tana khel thei lo tur uihawm tak pakhat chu hepa hi a ni ngei awm e. Nikum August thlaa New York Red Bulls nen pre-season friendly an khelh ṭum khan a keimit a tina a, hei vang hian ala chawl char char a, England tan chuan thil pawi tak a ni.