Inrinni zan Premier League inkhel post loh a la ni a, Chawlhni zan inkhel post a ni tawh bawk si a, club hrang hrang fans-in he website hi tan lam neiah an ngai ang tih a hlauhawm deuh. Tlaikhawhnuah, inthlahrung takin Inrinni zan inkhel ka’n post ang e.

Khel chhe zawk Arsenal an chak
Tun season-a Anfield-a la tlawm lo Liverpool chuan an mikhual Arsenal chu an hneh lova. Robin van Persie chu Arsenal tana khel tha awmchhun niin, a goal hnih hmangin Arsenal a chakpui a, tun season-a Anfield-a Liverpool hneh thei hmasa ber an ni ta a ni.

He inkhelah hian Liverpool chu inkhelh tan tirh atanga a tawp thlengin a chungnung zawk an ni tluan chhuak zak a. Mahse Dirk Kuyt chuan penalty a pet goal lova, Kuyt leh Suarez-te chuan post an pet per ve ve bawk a. Corner pawh Liverpool-in vawi 18 an hmuh laiin Arsenal hian an hmu ve lova, chu chuan an inkhel chanchin a hril chiang hle awm e.

Suarez-a tlûk phakar vangin Liverpool hian penalty an hmu a, mahse Kuyt chuan a pet goal lova, a rebound pawh a pet goal chuang lo. Hemi hnu lawk hian Liverpool tana khel tha tak Jordan Henderson cross chu Laurent Koscielny chuan an lamah a ti goal palh a. Mahse rei lo teah Van Persie chuan a head goal a. Hun pek belhah Van Persie finishing tha lutuk kan hmu leh a, angle awm tawh lovah, Pepe Reina dan rual lohva kawhin, dinglam kilah a hem goal a ni.

Liverpool hian midfield-ah Arsenal an dang chat reng a, mahse goal khung an harsat an la chhunzawm zel a. An inkhelh danah duhthusam ni mahse, goal an khung theih loh tlat avangin a tawpah an chak lova, tunah chuan Champions League khelh phak an inbeisei thei tawh lovang.

Van Persie hian tun season-ah goal 30 a khung tling tawh a, League-ah ringawt goal 25 a khung tawh a; Arsenal hian top 4 chu an beisei ngam leh chiang tawh a tih theih awm e.

City an kal zel
Manchester City chuan Bolton 2-0 a hnehin anmahni hnaih bertu Manchester United chu point 5 in an tlansan leh ta a (Chawlhni zanah United an chak avangin an inkar hi point 2 a ni leh tawh). Gael Clichy-a shot, Bolton defender Gretar Steinsson-a’n a lo dan pial hmangin City hian hma an hruai a. Hemi hnu hian City tan Mario Balotelli chuan hnai set sawt atangin a pet goal leh a, City an chak chiang hle.

He inkhelah hian beisei aiin Bolton an khel tha a, Ryo Miayaichi chuan City defender leh Joe Hart pawh a tibuai ve phian a. Chu bakah an tlar hnung lamin City hmatawngte an chai thei angreng tlat bawk.

Balotelli hian hrem vanga game 3 a khelh tawh loh hnuah pawh goal a khung thei tih a rawn lantir leh a, tun season-a a goal 14-na a ni a. Mancini chuan tun season-a a player tha pahnih David Silva leh Sergio Aguero te a chawlhtir chungin City hian Bolton hi an ngam hle a, goal an khung thei lo zawk a ni.

Heti hian City hi an home-ah vawi 19 an chak zawnna niin, an hmelma Manchester United-in home-a chak zawn rei ber record, nikum October thlaa an lo siam tawh chu an nihrual a, City hian an lehpel thei dawnin a lang.

Chelsea an chak lo!
Kum 2002 September thla atanga a zawna Premier League match-a vawi 3 chak thei miah lo West Brom chuan Chelsea lakah ber kher a zawna an vawithum chakna an han hmu a, Inrinni zana inkhel result langsar ber a ni hial awm e.

Chelsea tan Daniel Sturridge chuan goal chance tha deuh deuh vawihnih a thelh a, a tawpah West Brom hian, hun tawp hma minute 8 a la awmin, buai nuaih nuaih karah Gareth McAuley hmangin goal an khung ta si a, Chelsea an chak zo ta lo a ni.

Chelsea hian an league game hnuhnung 12-ah vawithum chiah hnehna an chang a. Tunah hian hmasawn chak Arsenal aiin point 3 in an hniam tawh a, 5-na ni mekin, Champions League an khelh phak loh mai a hlauhawm tawh khawp mai.

Inkhel dangah Wigan chuan an mikhual Swansea chu si hnih faiin an hneh lova, table mawngphahah an thu nghet zel. Blackburn-in an mikhual Aston Villa lakah si an phurh hnuin 1-1 in an draw hram a, relegate lohna chance an la nei a. Stoke City chuan an mikhual Norwich City chu 1-0 in an hneh a, pariatnaah an kaisang bawk.