Kum 29-a upa Vidic hian a chawlh thu a puannaah ṭhangtharte’n hma thar an lak a hun tawh thu leh tlema upa deuh zawkte chuan Serbian Jersey an mangṭha a ngaih tawh thu a sawi a ni. Vidic bakah Dejan Stankovic pawhin a chawlh thu a puang ve nghal a. Serbia hian nakuma European Championship lo awm turah Slovenia an hneh loh vangin an in hlangkai zo ta lo a, hemi hnu lawk hian an chawlh thu an puang ta a ni. Hemi inkhelah hian Vidic hian penalty a pet goal lova, Slovenia hi 1-0 in an chak ta a ni.

Kum 33-a upa Stankovic pawhin ram tan vawi tam tak ka khelh bakah nasa takin ka lo pui tawh ṭhin a, tunah chuan Inter Milan tan chauh theihtawp a chhuah tawh tur thu a sawi bawk. Vidic hian ram tan ṭum 56 a inlan laiin Stankovic ve thung hi chuan ṭum 102 lai a inlan thung a ni.