India in match pawimawh a neih apiangin Jeje Lalpekhlua kan kawm thin a, Bayern Munich leh India inkhelh zawh khan a kawmna kan tichhuak lo tlat mai a. Zofooties lam atangin zawhna kan dawn nasat phah hle. Tlai tawh deuh mahse Jeje-a kawmna chi dang deuhin kan rawn ti chhuak hram e.

Tu nen nge jersey an in thleng?

Inkhelh tan hma kha chuan Arjen Robben thlengpui ngei a duhthu a sawi a, mahse inkhel zawh hnua a thleng pui chu Bastian Schweinsteiger a ni. Arjen Robben hian full time a khel lova, hun tawp veleh khan Jeje-a hian Germany player tha ber zing ami Bastian Schweinsteiger hi a pan nghal a, jersey a thleng pui ta a ni.

India Vs Bayern Munich bikah khan tunge tha a tih ber?

Second half a lut ve tho France thiampuipa Franck Ribéry kha tha a ti takzet a, a chet ran mai bakah ball a a thiam avangin a a hlauhawm thu a sawi a. Chutihrualin jersey a thlengpui Schweinsteiger-a’n midfield lai a luahlum hneh em avang leh a ball sem a that em avangin tha a ti em em bawk.

Bhaichung Bhutia nge tha zawk Sunil Chhetri?
Bhaichung Bhutia leadership quality chu tha a ti a, field chhungah hruaitu tak tak anih thu a sawi. Mahse Rangers a a trial pui Sunil Chhetri chu ball thiam a tih zawk thu leh tha a tih zawk thu a sawi a. SAFF Championship a a striking partner Sunil Chhetri chu khelphui nuam a tih zawk thu a sawi bawk.

Engvanga first eleven lo nge a nih?
A First eleven loh chhan hi amah (Jeje-a) pawn a hre bik lova. Amah aia lut Sushil Kumar Singh kha tunah I-league 2nd Division team United Sikkim ah a khel mek a, an game hnuhnung ber (SAFF Championship Final) ah khan substitute atanga rawn lutin goal ropui tak a khung a. Mahse khami game ah khan Jeje hian goal a thun mai bakah goal zawng zawng ah khan a inrawlh a, performance vanga substitute tir chu anih a rinawm loh. United Sikkim hi Bhaichunga team anih avangin Sushil Kumar hi an duhsak zawk ah a ngaih theih.
Jeje hian competitive match ah chuan a first eleven leh ngei a rin thu a sawi bawk.

Rindika hi Jeje-a tan engtin chiah nge a pawimawh?
Jeje a sawi danin Rindika nen hian an khelh dun tam tawh avangin an inman em em a, Rindika’n ball a chan tawh chuan, a pass na tur a hre thei niin a sawi. Chumai bakah nikum season pawh khan I-league-ah Rindika siam vawi 6 ngawt a ti goal bawk. Rindika leh Jeje-a hi Indian Arrows ah an khel dun thin a ni.

Ava ho ve!
TV uluk taka i lo en chuan, Rindika’n a shot Jeje-a’n a awm a, a lo dang khan Jeje an,”Ava ho ve” tih a sawi kha a hmui phun atangin kan hre thei awm e. Jeje chuan a lo dang kha a ui takzet thu a sawi a, “Ball head tur khan ka zuang a, ka tla thla leh chiah tihin Rindika khan a rawn shot nghal a, ka lehhawi hman ta lo a ni” tiin a thianpa leh a teammate ni bawk Rindika a ui pui thu a sawi.

A player te khelh danah India Coach Savio Medeira a lawm em?
A naute khelh danah India Coach Savio Medeira a lawm takzet a, a naute chungah lawmthu a sawi nghe nghe.

Keini lam ngaihdan
Mizo player zingah hian thiam tak tak an awm a, chung zingah chuan entawntlak tak hi chu an tam lo khawp mai. Jeje-a hi player entawntlak zing ami a ni a, tun dinhmun a thleng pawh hi a phu kan ti hle a ni.