ISL : A club hluiah Thuammawia a let

Indian Super League club Bengaluru FC chuan kum hnih chhung atan goalkeeper Lalthuammawia Ralte leh defender Pratik Chaudhari te an lakluh thu an puang.

“Bengaluru – ah hian hriatreng tlak thil tam tak ka tawng a, ka club hluia ka kir leh tur hi ka lawm hle a ni. Team tha tak a tel tur ka nih bakah he khawpui leh BFC fans te nen inkungkaihna tha kan nei hian min tiphur hle a ni,” tiin Shillong Lajong star hlui Thuammawia hian a sawi.

Mizoramin goalkeeper a neih tawh zinga tha ber pawl Thuammawia hian Lajong – a hming a chher hnuin kum 2014 – 2018 chhung khan Bengaluru tan hian a khel a, 2015/16 I-League nomawi an chawi theih nan player pawimawh niin 2016 AFC Cup final – a goal veng pha a ni. Heng hunlai hian India national team – a a tel lo kha Indian football hrechiang tam takin mak an ti hial thin.

Player tha dang awm vang leh a inhliam zeuh avangin hmun a chang tlem tial tial a, kum 2018 khan FC Goa pan mahse beisei angin a invawrh mai thei lo a, Kerala Blasters – ah te ‘loan’ a khel lehin season liam ta khan East Bengal – ah ‘loan’ in a khel a. Season tharah beiseina sang zawk nen Bengaluru FC a pan leh dawn ta a ni.