India rama football club hlun tak East Bengal chu season thar atanga Indian Super League (ISL) khel thei tura ngaih ni tain document pawimawh hrang hrang te an buaipui tan mek. Punjab FC pawhin khelh tumin hma an la mek a, thuneitute nen an indawr mek.
ISL chungchanga thuneitu ber Football Sports Development Limited (FSDL) chuan nimin April 22, 2020 khan meeting neiin ISL team 12-a tihlen chungchang an sawi a, thumum la nei lo mahse I-League atangin club pahnih chhoh ngei tura ngaih a ni a, East Bengal chu chiang saah ngaih niin club dang pakhat erawh eng club nge ni ang tih ala chiang lo.
FSDL hian thla leha meeting an neih leh hunah hemi chungchang hi an rel fip ang.
East Bengal hian kum 2017 daih tawh khan ISL-a luh tumin document thenkhat an buaipui hman a, mahse, rokhawlhna a awm zui tak avangin an puitlin ta lo. Nikuma All India Football Federation (AIFF) leh Asian Football Confederation (AFC) ten Indian football kal zel dan tur (road map) an pawm tlanah 2020/21 season atangin ISL chu team 12-ah tihlen tur niin he hmun ruak hi tunge luahkhat ang tih erawh a la chiang lo thung a ni.
East Bengal hian sponsor-tu tur zawng mekin heng zingah hian company Procter & Gamble an tel.
Minerva Punjab tia kan hriat thin, a leitu Hari RoundGlass Sports hming chawia RoundGlass Punjab FC ni ta pawhin hmunruak pakhat la awm thei nia ngaiin khelh ngei tumin hma an la mek a, anni hi sum tlachham lo an nih avangin lo thlang ta pawh nise sum lamahan buai zui a rinawm loh.
India rama football club upa ber, tun season I-League champion Mohun Bagan erawh season thar atangin ATK nen an chhunfin tawh dawn avangin ATK Mohun Bagan tiin ISL-ah kan hmu ang.
