Zanina Indian Super League final khelhah Mumbai City FC chuan si khat an phurh hnuah ATK Mohun Bagan 2-1 a lehthalin nomawi an chawi.
He inkhelah hian ATK tan David Williams chuan minute 18-naah goal hmahruai a thun a, an defender rinrawl Tiri – a’n an lamah ti goal palhin Mumbai siphurh a sutsak a, an chakna goal hi minute 90-naah Bipin Singh an a thun leh a ni.
Sergio Lobera enkawl Mumbai hian ISL nomawi an vawi khat chawina a ni a, champion chu sawi loh final tak ngial pawh an la thleng ngai lo. Kumin zet chu league round – ah pawh point hmu sang ber niin ISL Shield an chawi nghe nghe. Champion team – ah hian Mizo tlangval Hmingthanmawia (Valpuia) a tel a, ZoFooty.com in thinlung takin kan lawmpui e. Tihian Mumbai City hian season tharah AFC Champions League an khel ang a, ATK Mohun Bagan hian AFC Cup an khel thung ang.
Mimal lawmman sem zingah Northeast United midfielder Lalengmawia (Apuia) chu phu takin Emerging Player of the Season atan thlan a ni. He lawmman hi an vawi 7 semna niin tunhmain Jeje Lalpekhlua (2015), Jerry Lalrinzuala (2016) leh Lalruatthara (2017/18) te’n an lo dawng tawh bawk.
ISL 2020-21
Champions : Mumbai City FC
Runners Up : ATK Mohun Bagan
Mimal lawmman :
Hero of the League : Roy Krishna (ATK Mohun Bagan)
Golden Boot : Igor Angulo (FC Goa) – 14 goals
Golden Glove : Arindam Bhattacharya (ATK Mohun Bagan)
Emerging Player of the League : Lalengmawia (Northeast United)
[Image Credit : Indian Super League]
