ISL CLUB TE DUH LOH PLAYER LANGSAR ZUAL TE

Estimated read time 4 min read

Indian Super League player draft neih zawh takah Indian footballer 134 in club thar an nei a, chutih rualin player 71 in leitu an nei ve lo. An zingah hian hming langsar tak tak, mi thenkhatin ISL club te’n an inchuh hial tura an ngaih te pawh an awm a, mahse lei an ni ve ta si lo. An zinga thenkhat chauh lo tarlang ila :

Gouramangi Singh : Tun hnai lawka Aizawla rawn inkhel Gouramangi Singh hian ISL-ah Chennaiyin FC leh FC Pune City tan a khel tawh a. Kum 31 a upa niin a hlawh tur chu cheng nuai 35 a ni. Amaherawhchu AIFF Player of the Year te, I-League Best Defender te leh Indian footballer zinga kum khata cheng vaibelchhe 1 hlawh hmasa ber a nihna te chuan a chhanhim zo lo a, season hmasaah inhliam vangin match khat chauh a inlan bawk nen, club te hian ‘risk’ an la ngam lo ni berin a lang. Draft neih hma khan Jamshedpur FC in lak an tum dawn niin sawi awm mahse ISL hmasa bera Indian footballer manto ber kha tunah chuan hnawl a ni.

Sandip Nandy : Ani pawh hi FPAI XI zinga mi kha a ni a, India goalkeeper hlui a ni. Kerala Blasters in ISL final vawi hnih an luh tawhah a la tel ve ve a, kuminah erawh leitu a nei rih lo. Kum 42 lai a nih tawh avangin goalkeeper rinrawla hman chi a ni tawh lo a, chutih rualin thlaveng atan erawh a la tha viauin a rinawm.

Dharmaraj Ravanan : Kum 29 a upa defender hi ISL tan tirh atangin FC Pune City tan a la khel char char a, kuminah erawh thlan a ni ta lo. Player tawnhriat ngah tak niin Dempo, Mahindra United, Churchill Brothers, Mohun Bagan, Sporting Clube de Goa, Bharat FC leh Chennai City FC tan a khel tawh a, I-League nomawi vawi thum a chawi tawh. Defender tha a nih ang ngeiin cheng nuai 50 lai a inchhiar a, to an ti deuh pawh a ni mahna le.

Rana Gharami : Kumin Santosh Trophy a West Bengal champion team captain kha a ni a, FPAI XI – ah a tel bawk. Defence leh midfield – ah a tul dan a zirin a chhawr kawp theih a, Santosh Trophy a Mizoram manager pawhin “A khawng khawp mai” tiin a sawi. Mohammedan captain kum 25 a upa hi cheng nuai 12 man chauh ni mahse leitu a hmu zo lo a, ISL draft dawna a club khelhna Mohammedan nena an boruak thlir phei chuan a lainatawm viau mai.

Abhishek Das : Kum 23 a upa Abhishek Das hi tun ISL draft-a player lei ngei tura ngaih, lei loh zinga mi a ni. TFA chhuak defender hian draft neih hma in a hlauhthawn loh thu a nu a hrilh nghe nghe. ISL season tin Chennaiyin FC tan a la khel ziah a, India tan age level hrang hrangah a khel tawh bawk.

Nallappan Mohanraj : India senior team tan pawha koh lo ni tawh Mohanraj hian ISL – ah Atletico de Kolkata leh Chennaiyin FC tan a khel tawh a, ISL champion hmasa ber team-ah a tel. India junior team – tan captain armband a hreng tawh a, tawnhriat a ngah bawk avangin ‘back-up’ atan tal pawh club te’n an la lo hian mi mak tih a hlawh deuh.

Alen Deory : Kum 21 a upa Assamese forward hi Indian football-a talent nei tha ber pawl a ni a, ISL draft neih lai khan India U-23 tan Qatar-ah AFC U-23 Championship Qualifier a hmachhawn lai a ni nghe nghe. SAI, TFA, IMG-Academy leh AIFF Academy – ah te a lo awm tawh a, 2014 atang khan Shillong Lajong tan a khel. NorthEast United tan ISL 1 leh ISL 2 a khel tawh a, cheng nuai 10 chauh a inchhiar avangin Kerala Blasters lamah amah hrechiangtu Thangboi Singto-a’n a lak rin ni mahse nikum I-Day football a Lammuala mipui mit la tak Deory hi thil mak tak a thleng te a nih loh chuan ISL-ah kan hmu dawn ta lo niin a lang.

Anni bakah hian thlan loh zingah Delhi Dynamos tana khel tha tak S.Malsawmtluanga te, Bengaluru FC tana I-League vawi hnih lo chawi tawh Beikhokhei te, thawk khat laia Indian footballer talent nei tha ber ti hiala sawi thin Uttam Rai te, India defender hlui NS Manju te, Bengaluru FC midfielder thin Darren Caldeira te, India junior team captain thin Souvik Das bakah India tana lo khel fo tawh Debrabata Roy leh Gurjinder Kumar te an tel a ni.

Tarlan tawh angin draft a thlan tak loh player te hi ISL club hian an mamawh phawt chuan an la lalut thei a, an tan kawng a la ping vek bik lo. Tin, player thenkhat hi I-League club nen an inrem tawh niin hriat a ni.

C Tlanthianghlima

Football tui ve tak

You May Also Like

More From Author

1 Comment

Add yours

+ Leave a Comment