Indian Arrows coach Shanmugam Venkatesh chuan ISL club te hian ramchhunga player beiseiawm te talent tihpun kawngah an pui lo nia a hriat thu a sawi.
IFA Shield khel tura inbuatsaih mek Indian Arrows coach hi The New Indian Express chuan kawmin,” State thenkhat hian ISL club an nei hi an chhuang a, mahse heng club – te hian ramchhunga talent nei te hi an pui lo a ni. ISL hian football than zelna ai chuan entertainment lam rawng a kai. Player hlui ka nih ang leh India captain hlui ka nih angin ramchhunga player – te hmasawn zel nan chuan tualchhung (state) league hi a pawimawh em em a ni,” tiin kum 42 a upa midfielder hlui chuan a sawi.
Sawi zawm zelin India captain hlui chuan,” State tin hian league tha tak tak nei se chu chuan kan national team – ah rah tha a chhuah thei ang. Kan hunlai kha chuan West Bengal leh Goa – a khelh theih kha chu player – te tan chawimawina sang tak a ni,” a ti bawk.
Venkatesh hi a vanglaia Indian footballer lar ber pawl niin club hrang hrang pathum – Salgaocar, East Bengal leh Mahindra United tan National Football League (I-League a la awm lo) nomawi chawi thei a ni a, kum 2001 leh 2003 khan NFL Best Player a nih bakah 2004 khan AIFF Player of the Year a ni bawk. Coaching lamah AFC ‘A’ License coach niin Indian Arrows a enkawl bakah India senior team – ah assistant coach a ni mek.
