ISL : Odisha FC- ah Samuel Lalmuanpuia

Mizo tlangval beiseiawm tak Samuel Lalmuanpuia chuan a khelh mekna Kerala Blasters chhuahsanin ISL club vek Odisha FC a zawm a, kum hnih daih inremna an ziak.

“Season liam ta khan duh angin ka inlan hnem thei lo a, mahse engkim hi Pathian thu thu a ni a, ka thil tawnah hian lawm zel ka duh thin. Hei tunah chona thar hmachhawn turin Odisha ka han pan dawn chu a ni a, ka hmalam hun engkim hi Pathian kutah ka dah tawp a ni,” tiin Minerva midfielder hlui hian ZoFooty a hrilh.

Shillong Lajong pumchhuak Samuel-a hian Lajong youth team atanga bul tanin senior team tan game 65 khelin goal 13 a thun a, I-League ah naupangte niin captain armband a hren theih bakah 2017/18 season phei kha chuan I-League Best Emerging Player atan thlan a ni nghe nghe.

Odisha FC Director Rohan Sharma pawhin Mizo tlangval chu player tha a nih thu sawiin,” Samuel-a hi hun engemaw chen ka lo en thlithlai tawh a ni a, kan lalut thei ta hi ka lawm hle. Lajong tana ropui taka a lo khelh tawh ang khan Odisha – ah pawh hian a theihna sang bera a khelh theih kan beisei a ni,” tiin a sawi.