Football news lampang chu ka ngaihtuah rang ve hman lova, chuvangin midang kutah ka dah tawp mai. Helam ve thung hi kan ziak ve ang e.

Kan Lalpa Isua Krista kha khawvela a len lai ni khan hman thiam em em mai a nei a, chu chu tehkhin thu a ni. Chu tehkhin thu a hmannaah chuan hmanthiam deuh mai a nei lehpek a, chu chu a hun lai mil leh a awmna mil a tehkhin thu hman kha a ni. Buh hmuna a awmlai chuan buh hmangin tehkhin thu nalh tak a sawi a, a ngaithlatute tan chuan a chiang em em mai a ni. Thlai hmuna a awm lai chuan antam te tehkhin thuah a hmang leh mai a, a chiang hle thin awm e. Judai ram lamah chuan Beram an vulh nasa hle mai a, chuvang chuan Lal Isua tehkhin thuah khan Beram leh Berampu chungchang a tam hle. Grep an ching nasa hle bawk a, grep leh a hrui tehkhin thu pawh kan hmu hnem khawp mai. Heng tehkhin thu a hmante hi Kan Lalpa khan a hrechiang em em mai a, a zir pawh a zirchiang ve a ni maithei a ni.

Awle, Kan Lalpa Isua Krista kha tunlai hunah hian, mizoramah awm ve ta sela eng tehkhin thu nge a hman uar ber ang aw? Kei chuan Football leh a vel hi a hmang uar hle in ka ring. Hei aia Mizo thalaite tana tehkhinna tur remchang hi awm thei hian ka hre mawlh lo. Ka nau chuan Football hi engatan mah a ngai lova, mahse loh theihloh avangin a hre ve lutuk. Engvangin maw kan tih chuan tunlai chhanah football sawi thei lo chuan titi tur a hre lo mai a ni. Heng zawng zawng han thlir hian Kan Lalpa pawh khan football hi tehkhin thu atan a remchan em avangin tuipui lo mahsela a zirchiang ve thovin ka ring.

Pathian rawngbawltute chuan kan zir ber chu Lal Isua a ni. Lal Isua anga tehkhin thu kan la hmang dawn a nih chuan Football tluka remchang hi a awm hleinem. Chutihlai kara football kan tuipui duh lo emaw, kan ngaihven lo emaw, kan zirchiang duh lo a nih chuan SUAL chi khat a ni mai lo maw? Football tluka kan thalaiten ngaihven an neih loh laia inkhel en pawh kan peih ve lo a nih chuan heng mite hnenah hian eng thu nge kan sawi dawn? An hriatthiam theih turin engtinnge Pathian thu kan sawi ang? Rawngbawltu duhtak, hlawk zawka Pathian thu hi tunlai mite hnenah puanchhuah I duh chuan FOOTBALL hi rawn ngaihven rawh le. Tichuan I thusawi kha tunlai mitten an rawn ngaihven ang a, chanchintha chu an lo pawm ve dawn nia.

Entirna: Arsenal chu inkhelh an thiam lutuk, an passing a mawi a, an chevel ringawt pawh a hmuhnawm. Mahse a pawimawh ber GOAL an thun thei thin lova, lawmman an dawng thei ngai lo. Kohhran leh KTP chevel hi a mawiin, a hmuh pawh a nuam. Amaherawhchu GOAL-ah kan chhuihlut thin em? etc.