Pathianni zana Italian Cup final khelhah Napoli chuan Edinson Cavani leh Marek Hamsik te goal hmangin Juventus 2-0 in an hneh a, kum 25 kalta-a an lo lak tawh Italian Cup champion an ni.

He inkhelah hian Napoli an khel ṭha hle a. Italian Serie A champion Juventus hian a khelh hrim hrimah pawh an hneh lo zawk a, Napoli midfielder Gokhan Inler a khel ṭha fal hle a ni. First half-ah goal a lut lo a, minute 63 ah Juventus keeper Marco Stotari chuan penalty box chhungah Ezequiel Lavezzi a tihtluk avangin penalty a chawi a, hei hi Napoli striker Cavani chuan a thun. Hemi hnu hian Juventus game a kâng hret a, mahse an phurna tireh raih turin minute 83 ah Marek Hamsik chuan Napoli goal hnihna a thun a. Juventus tan tihngaihna a awm tawh lo. Hamsik goal thun tura Goran Pandev through ball pek a ṭha kher mai.

Italian Cup hi kum 1990 hnua Napoli in trophy lian tham an lak leh hmasa ber a ni a, hemi kum hian Serie A ah an champion a ni. Italian Cup bika an champion hnuhnun ber phei chu kum 1987 a ni daih tawh nghe nghe.

Final-a chak loh hrim hrim hi a na tawh a, Juventus tân he match a an chak loh hi a na lehzual awm e. Goal thuntu ropui Alessadro del Piero chuan Juventus tâna a game hnuhnung ber a khel ta a, Juve fans ten mittui tla chungin he ‘legend’ hi an thlahliam. Tin, tun season-a chak loh nei lo a an kaltluan tur chu he game hian a titawp ta a, hemi hma hian game 42 zet chu hneh loh nei loin an lo kaltluang tawh a ni.

Napoli board, players leh fans te champion lawmin an lam a, season tharah Champions League an khelh phak dawn loh avangin Lavezzi, Cavani leh players ṭha dangte hi chelh zo tak ang maw?