ITALIAN FOOTBALL A DANGLAMNA THLENTU ‘LAW 91’

Tunkar tir lawkah nipui transfer bazar khar a ni a. Chutah chuan a bikin Premier League atangin Serie A club pan an awm nual a, chung zingah chuan Aaron Ramsey, Romelu Lukaku, Alexis Sanchez, Chris Smalling, Henrikh Mkhitaryan,. Fernando Llorente, Matteo Darmian, Rachid Ghezzal, Pedro Obiang leh Danilo te chu a langsar zual an ni.

Premier League atanga Serie A club zawm eng emaw zat an awm ang hian league dang atanga Italy pan hi player tam kumin hian an awm bawk a. Hei hi engvang nge ni ang? Engvangin nge a bikin football playerten Italy an pan ruih ruih? ti a ngun taka han ngaituah chuan Italy sawrkar in kumin kumtira bill thar an pass – ‘Law 91’ hi a chhan bulpui ber pakhat a niawm e.

Italy sawrkar chuan kumin atanga hman turin chhiah (tax) pêk dân thar ‘Law 91’ an duang a. Football anga sawi chuanin player ten an hlawh zawng zawng (gross) atanga 50% atang chauhin chhiah an pe tawh dawn a ni. Chutiang a nih chuan Juventus star Cristiano Ronaldo hian kumkhatah Juve atanga hlawh a lak zawng zawng hi £52m vel anga ngaih a ni a. He a hlawh zawng zawng atang hian £26m atang chauhin chhiah a pe tawh dawn tihna a nih chu.

Law 91 hian Italy sawrkar in chhiah atanga sum an lakluh chu kumin bikah chuan a tihniam dawn tih chu a chiang reng a. Mahse Italy sawrkar hian kumkhat atan chauh thil thlir lovin hun lo la kal lehzel tur atan thil an thlir a, he an dân thar duan hian infiammi tam tak, a bikin footballer te Italy kal turin a hip ngei an ring a. Player ten Italy an pan a, a bikin a hlawh tam hovin Serie A club a khleh an thlang chho zel a nih chuan ‘Law 91’ hi Italy an pan chhan bulpuiber pakhat a ni ngêi ang.

Tin Law 91 bâkah hian Italy hian kum 2017 khân ‘The New Resident Regime Law’ tih chu an kalpui bawk a. He dânah hian foreign-player (Italy ram mi ni lo) ten ram pawn atangin sum engzat pawh lalut ta se, kumkhatah €100,000 chauh chhiah an pek a ngai a. Hei hian kawng tam takin football langsarte a hip tel bawkin a rinawm.

He dân hi Cristiano Ronaldo in Serie A club a zawm chhan niin La Liga president Javier Tebas chuan a lo sawi tawh kha a ni a. Portugal captain te ang infiammi ram hrang hrang atanga sum lalut tan chuan enganga tam pawh lalut se ram pawn atanga sum an lakluh atanga €100,000 chiah kumkhata chhiah an chawi a ngaih avangin ‘New Resident Regime Law’ hi sum lalut tam tan chuan Italy pan chhan pakhat a tling bawk.

Ram dang, a bikin England leh Spain ah te chuan an sum lakluh zawng zawng atangin an chhiah pêk tur hi chhut a ni a. An hlawh bakah company hrang hrang atanga sum an lakluh te belhkhawm vek niin chuta tang chuan an chhiah pêk tur chu chhût a ni ta thin a. Hei hi a bikin footballer te hlawh a sân em em na chhan a ni pakhat ta bawk a ni.

Italy sawrkar hian dân dang pakhat kalpui tum an nei mek a. Chu chu Italy chhim lam, economy hniam zualna leh a mi chêng nawlpuite mi hausa an tam lohnaah chuan chhiah hi 70% lai mai awl tir a, chuta an hlawh la bâng 30% atang chauha chhiah pek tir turin ruahmanna an siam a. Hei hi an ti hlawhtling thei a nih chuan Serie A club zinga a hlawkna tel thei tur chu Napoli te hi niin anni hian player tha an hip phah ngêi a rinawm a. Mahse he dân hi Italy hmar lama awm club ten an duh loh thu an sawi avangin tunah erawh hi chuan kalpui a ni ta rih lo a ni.

Hun lo kal lehzel turah pawh football playerten Italy an pan a, player langsarten Serie A club liante an zawm chho zel a nih chuan ‘Law 91’ leh ‘New Resident Regime Law’ hi anmahni hiptu zinga mi an ni tel ngei ang a, chhiah pek tur a tlemna hmun na na na chuan pantu a nei tam turah ring ila, hei hi Italy sawrkar bawk hian a hlawkna an têl thei dawn a ni. Tin tun hma a kan lo hmuh thin angin Serie A club lianah te hian player langsar leh hrawl tak takte pawh an la awm leh thluah maithei a ni.