Kar hmasa lamah player nawrh vangin La Liga an khel lo tawh a, player nawrh vang thoin tunkarah Serie A inkhel en tur a awm dawn lo. La Liga erawh khelh ṭan a ni ang.

Italian Football Federation, Italian Players Association leh Lega Calcio (Italian league hrang hrang enkawltu bik) te chu vawiin thleng khan an inbia a, mahse an inrem thei lo. Players Association president Damiano Tommasi chuan chanchinbu mite kawmin, ” Tunkar tawpah Serie A a awm lo ang. A tawp thlengin inrem duhin kan inbia a, mahse kan thusawi ve zawng zawngte engmah lo mai a chang ta a ni” a ti.

Engnge an buaina

Italy a an buaina hi chu Spain a an buaina nen chuan a inang lo deuh. (Spain a buaina chu HEI HI). An buaina hi point in han dah ta ila:

1. Training dân dinglai duh lohna

Serie A club manager te hian an mamawh tawh loh vang emaw, an inkarah buaina a awm vang emaw a player an duh tawh loh te hi first team bula training neih ve an phal lo thei. A awmzia chu, player ṭha tak pawh nise, coach/manager nen intihthiam lohna an neih chuan a teammate te bulah train ve loin, second team/reserves bulah an train tir ṭhin.

Hei hi players te chuan an duh lo a, first team player chu first team bulah a train mai tur a ni tiin an thehlut. Club lamin manager te hi an chhanin thuneihna pumhlum pek an duh thung. Duh inang lo, tihhlawhtlin tum ve ve an ni a, hei hi an thu khel ber leh an nawrh chhan ber a ni.

He buaina hi season hmasa pawh khan an lo sawiho tawh a, ṭumhnih lai chu player te hian strike an tum tawh a, mahse ṭawngka in an inrem leh thei hlauh ṭhin a ni. Tunah chuan a dan a dang ta.

2. Income Tax extra

Italy sawrkarin dan thar a siam a, he dânah hian miin €90,000 aia tam a hlawh chuan €90,000 a khûmna chin ah Income Tax 5% a pek belh tur a ni a, €150,000 aia tam a lakluh a khûmna chinah chuan 10% a pekbelh ang.

Income tax extra pe tu tur chungchangah hian players leh club te an inrem thei lo a. Club in players te pek tur a ni an ti a, player ten club in min peksak tur a ni an thung. Hei pawh hi an chai rei leh viau a rinawm.

Serie A club 20 a captain te chuan strike hi an remti vek tawh a. Club hotute pawh inhmukhawm ve nghalin players te strike hi thlawp leh thlawp lo vote an la a, a thlawp lo 18 niin Siena leh Cagliari te chuan an player te an thlawp a ni.

Players te hian tunkara an strike vangin kar khat hlawh an la lo ang.

Engnge in ngaihdan?

Spain a players te an nawrhna kha chu a awm hliah hliah a, Serie A player te nawrhna hi engnge in ngaihdan ve le? Player leh club te hi an dinna a han indah chuan an dik viau ve ve mai a, han ṭan zawk viau tur pawh an awm lo niin a lang. Engpawhnise, a tuartu ber chu inkhel en chak em em fans te kan ni.

Serie A history ah a nawlpuia players te an nawrh hi a awm mang lo a, March 1996 chiah kha hetiang ang thil a thlen awmchhun a ni. Players te an lâr tawh a, an hausa tawh bawk a, ‘player power’ vanga buaina hi kan hmu tam tial tial dawn niin a lang. La Liga leh EPL en tur a awm tho a, Serie A chu kan la nghak rih mai a niang chu.