#Zofooty
ITALY KAN HRE CHIANG EM?
A hmasa ber in Italy football history hi tlema a zawng han sawi zuai ila.
Kum 1934,1938,1982 leh 2006 ah te World Cup champion an ni a, Germany nen vawi 4 ve ve champ tawhin Brazil (vawi 5) chiah an tluk lo. European Championship-ah erawh an la champion tam lova, kum 1968 khan a vawikhat nan an champion a, a hnuah final vawihnih thlengin kum 2000 ah golden goal rule hmangin 2-1 in France an hneh lo. Kum 2012 ah Spain in 4-0 in an sawp a, hei hi Euro final-a insawpna nasa ber record a ni nghe nghe. Kum 53 hnuah Euro 2020 ah an champion leh ta chauh a, final-ah penalty shootout hmangin a thlengtu England hnehin a vawi hnihna atan European champion an ni.
World Cup-a an champion hnuhnung ber tum 1982 hi chu mi tam zawkin kan en hman loh avangin kum 2006 atangin tawi fel deuhin an chet dan han tarlang leh ila.
World Cup 2006 ah Pirlo, Totti, Gattuso, Cannavaro, Buffon te hovn a vawi li nan World Cup champion an ni a, semi final-a a thlengtu Germany nen an intum kha mi tam tak chuan World Cup semi final hmuhnawm berah an ngai a, thenkhat erawhin World Cup match hmuhnawm berah an ngai bawk. A en pha ho kha chuan kan la mitthla thei mai awm e.
Euro 2008 ah erawh champion zui ta Spain kha quarter final ah penalty shooutout-ah an hneh lova, World Cup 2010 ah Paraguay, New Zealand leh Slovakia te nen awm hovin chak nei lovn champion lai an tla a, an mualpho takzet. Euro 2012 final-ah Spain in an sawp a, World Cup 2014 ah lah match hmasa berah England hneh mah se a Costa Rica leh Uruguay hneh lovin Group stage an paltlang zo leh bawk. Euro 2016 hi major tournament-a Italy squad chhiat ber tum an tih hial kha a ni. Mahse team tha Belgium te hnehin Last 16 ah Spain an hneh a, quarter final ah penalty shootout hmangin Germany an hneh zo ta lova, an tla a ni.
Italy Football Dark PeriodWorld Cup 2018 qualifier ah Spain hnuaiah awmin playoff an khelh a ngaih phah a, playoff ah Sweden nen intumin first leg ah 1-0 in an chak lova, 2nd leg ah goal thun tumin attacking game khel mah se Sweden tlarhnung an dingkhawng ve tlat a, goal an thun thei ta lova, kum 1958 hnuah a vawikhat nan World Cup an khel pha ta lo. World Cup ber an tlin tak lo avangin senior player Chiellini, De Rossi, Barzagli ten ram tana football khelh an chawlhsan thu an puang zui. Captain Gigi Buffon-a’n mittui tla chungin “Italy ram tan thil zahthlak tawpkhawk a ni, a bul thut (foundation) atang kan tan that a ngai” tiin ram tana inkhelh a chawlhsan thu a sawi zui ve bawk.
Italy league sang ber Serie A lah mite beisei a pha lo telh telh a, Italy football team ah hian “superstar” tih tur an lo awm lo ve zel bawk nen mi tam tak chuan Italy hi an ropui theih tawh loh an ring hial a ni.
Italy indinthar lehnaKum 2018 May ni 14 khan English Premier League-a Manchester City champion pui hmasa bertu Roberto Mancini chuan caretaker Di Biagio thlakin Italy manager hna a chelh a. Pa thu duh ve tak anih vangin Italy FA pawh hian Italy insiamthatna turah hian “free role” an pe. A coaching staff 4 a thlan tharte hi Sampdoria-a a teammate hluite an ni nghe nghe. Italy a enkawl chhung hian hian player 60-80 chuang zet a ko a, Serie B atangin player 10 vel lai koh a nei bawk. A hnuaiah hian player 20 velin Italy debut game an khel nghe nghe. Hetia player a rotate nasat rah hi tun Euro 2020 ah khan kan hmu ta chiah a ni.
Kumin Euro-ah khan 4-3-3 formation hmangin system nghet tak, possession football khel thei tur player chiah a ko niin a lang. Semi final-a Spain nen an inkhelh tum tih loh kha chu ball chang tam zawk anni vek. Chelsea midfielder Jorginho khan game tempo a control hneh em em a, a hma chiaha awm Verratti leh Barella te ho nen midfield game an thunun hneh hle. Sensi, Pellegrini leh Zaniola te ho inhliam vangin an ko thei lova, an aiah hian Locatelli, Pessina leh Castrovilli te kovin Group stage hmasa pahnihah Locatelli thatzia kan hmu a, game thumna leh last 16 ah Pessina chu a chetha leh em em bawk . Tlarhma lamah Immobile leh Insigne te chu khawih chet thiang lo tluk an ni a, squad an puan tirh khan Chiesa nge Berardi khel zawk ang tih kha a ni ber. Group stage ah Berardi hmang zawkin knockout stage-ah erawh Chiesa zawk hmang lehin a tihfuh zia kan hmu leh bawk. A inhliam lo anih chuan Chiesa hi nakin zela Italy attack tina tur ber anih a rinawm.
World Cup 2018 an khelh phak lo hnuah heti taka Mancini-a’n a siamtha hi fak loh rual a ni lo. Man City a enkawl lai khan sum vanga champion thei chauhah mi tam tak khan an ngai a, a dikna chen pawh a awm mai thei. Player nei tha si kha attacing football hmuhnawm a rawn phochhuak tam lo ve bawk a. Mahse Italy a enkawl danah hian a managing structure vel hi a in adapt ve zel niin a lang a, possession football a khelpui satliah a ni lova, hmana Italy hmingthanna “defending” thlah thlam chuang si lova “attacking” hmuhnawm min entir hian a tichiang telin a hriat.
Kumin Euro ah khan group stage atanga knock out stage thlenga an khelhdan ena champion phu awmchhun chu Italy hi an ni hial awm e. Hmanni lawka hneh lo nei lova kaltluang rei ber (36 matches unbeaten) record an siam nghe nghe anih kha.
Thilmak tawpkhawk a thleng te anih loh chuan World Cup 2022 hi khel pha tura dah ta ila, players senior Chiellini, Bonucci, Jorginho, Verratti, Insigne leh Immobile te ho awmna kara player naupang Bastoni, Chiesa, Barella, Locatelli, Zaniolo, Pellegrini, Raspadori, Scamaca leh Kean te ho hi an hmuhnawm phian mai thei a ni.
