Thla sawmpahnih teh meuh inhliam vangin a chawl tawh a, Arsenal midfield lalpa hi tun thla chhung ngei hian first team-ah a inlan leh theih beisei a ni. Gunners leh Three Lions nghahfak ni mah se Jack Wilshere hi kum 20 lek a ni a, a chawl rei tawh bawk si a, eng nge a rawn an ang le?

Jack Wilshere hi 2010/11 season khan a maka makin a rawn che tha a, a bikin Champions’ League-a Barcelona nen an intum tuma a khel kha a ropui. Ani kum 19 mi lekin Xavi leh Iniesta te awmna midfield a thunun thei kha football fans-te mak tih rawn a nih kha. Mahse kum khat chuang a inkhel leh tawh lo.

Inhliam reng Wilshere hi van Persie kalsan tak no.10 kawr an pe a, Arsenal manager Arsène Wenger-a’n a chungah rinna a nghah nasat zia a lantir. He kawr hi amah Wilshere sawi dan takin club legend “dik tak” (van Persie te ang ni lo :P) Dennis Bergkamp hak thin a ni a, a phur hle.

Hetih lai hian tun season Arsenal midfield hi kan en chuan an tha rual hle a, Liverpool nen an inkhelah khan a lang chiang hle. Wilshere ang bawka inhliam ve reng Abou Diaby a khel tha a; Arteta, Rosicky, Chamberlain, Arshavin leh lei thar Cazorla te hi el tham thah an ni dawn. A kum rualpui Coquelin leh Frimpong te lah hian an khel chak ve zek zek tawh bawk si.

Centre forward hnung chiah hi ‘no.10 position’ tih thin a ni a, reserves leh youth lama Wilshere khelh fona position a ni. Wenger hian a no. 10 thar hi attacking role pek a tum em ni tih hi rilruah a lang a. Wilshere hian Arsenal Under-18 tana a season khatnaah attacking midfield atang game 18 ah goal 13 ngawt a thun a, he’ng zinga a tam zawk hi kum 15 lek a la nih laia a thun a ni zui.

Jack Wilshere rawn dam leh tur hi a nghahhlelhawm a, trophy nghei rei tawh Arsenal hi eng chen nge a thlenpui theih anga, eng ang taka ropuiin nge a rawn ‘comeback’ dawn?