Kum 5 vel liam ta maia footballer tha leh man to tamna La Liga – a Best Midfielder ni thei kha kum 28 chauh la ni mahse a hnawng ta der mai. Real Madrid midfielder James Rodriguez chuan season tharah club thar a nei ngei dawn niin a lang a, Serie A club thenkhat leh Premier League club lian te’n Colombian midfielder hi an inchuh rin a ni.
Porto atanga hming chher James hian kum 2014 khan Monaco chhuahsanin pound maktaduai 63 in Real Madrid a zawm a, a hunlai hian khawvela footballer man to ber pawl a tling. La Liga- a a season hmasa berah Best Midfielder a nih bakah La Liga Team of the Season – ah a tel pha.
Khelmual chhungah che chhe lo mahse Real manager Zinedine Zidane – a player duhzawng a ni tlat lo a, tun season La Liga – ah pawh vawi 8 chiah a la inlan. 2014 World Cup Golden Boot dawng pha James hi 2017/18 lawk pawh khan Champions League Squad of the Season – ah la tel pha mahse Madrid khawpuiah a hnawng laklawh tlat.
Colombian midfielder hi Premier League club Manchester United, Arsenal leh Everton te’n lak an duh niin an sawi a, anni bakah hian Serie A club tha Napoli pawh an inrawlh rin a ni.
Khawvela attacking midfielder duhawm ber pawl ni thin kha euro maktaduai 28 vel chauhin a lei theih dawn a nih hmel a, a thiamna erawh a la ngai reng ang !
