India U-22 team te chanchin hi kan chhuah zin pawl tak leh ngaihven hlawh pawl tak chu a ni ngei ang le. Bangalore leh Delhi-a preparatory camp an neih zawh hnuin tunah hian Dubai-ah camp an chhunzawm leh a ni a. Dubai-ah hian Mizo 3 ngawt an kal tel a. Final selection neih-ah Champhai tlangval David-a chu a tling zo ve ta lova, ZoFooty chuan a pawi kan ti hle a ni. A kalzelna turah duhsakna kan hlan bawk e. Tihian India U-22 squad-ah Mizo pahnih – Didika leh Jeje-a te chauh an awm ta a ni. Tin, Jeje-a phei chu India captain atan ruat a ni nghe nghe.

Dubai an cham chhung hian Al Wasl Training Ground ah training an nei a. Al Wasl FC hi Mardona club enkawl kha a ni a. Dubai-a hian friendly match vawihnih an khel hman a. An match hmasa zawkah hian African XI an tum a. 2-2 in an in draw a. Didika phei chuan goal 1 a thun ve nghe nghe a. Heng African XI ho hi Cameroon, Ivory Coast leh Nigeria mite an ni tlangpui a. Dubai-a inkhela eizawng te leh zawng mek te an ni hlawm.

An match hnuhnung zawk hi nimin tlai khan an khel a. Dubai club ‘DNATA Club’ an tum a. 4-1 in India U-22 team te hi an chak a. Didika bawk hian goal 2 a thun leh nghe nghe a ni. He inkhelah hian DNATA te hi an chak loh zawk avangin an ‘fet’ deuh hlek a, Indian players te hi an pet nasa a, an intibuai deuh a. Inhliam a hlauhawm bawk nen, inkhel pawh an titawp hial a ni.

ZoFooty chuan Didika leh Jeje-a kan be fuh thei hlauh a. Jeje-a chuan heti hian a sawi. “Pathian zarah Didika nen min thlang ve a. A lawmawm khawp mai. David-a erawh a vanduai ta a, a pawi khawp mai. A dam tha vak lova, dam se chuan a tlin ngei ka beisei. Tin, keipawh ka ke hi a dam chu a ni tawh a mahse 100% fit ka la ni lo. Heti chunga min captain tir hi ka lawm tak zet zet a ni. Mizo mipui zawng zawng te min tawngtaipui turin ka sawm duh bawk che u a ni “ a ti a ni.

Didika chuan “A lawmawm khawp mai. Kan kal zelna turah Mizo mipui te’n min lo tawngtaipui chhunzawm zel ula ka duh a. Friendly match vawihnih kan khel a. Kan tumpuite hi team tha ve ve an ni a. Kan draw thei leh kan chak thei hi a lawmawm a ni. Hei hian kan tournament khelhna turah pawh hian phurna min pe nasa khawp mai.” a ti a.

Tunah hian player 23 an awm a. Naktuk hian Oman an pan ang a, AFC U-22 Championship qualifiers an khel ang. India hi Group A-ah an awm a. A thlengtu Oman, Iraq, Lebanon, United Arab Emirates leh Turkmenistan te nen an awm hova. June 23 hian an match hmasa ber an khel ang a, Lebanon an tum ang a, ni 25-ah Iraq, ni 28-ah United Arab Emirates (UAE), ni 30-ah Turkmenistan, July ni 3-ah Oman an tum ang.

Goalkeepers: Gurpreet Singh Sandhu (East Bengal), Ravi Kumar (Pailan Arrows), Soram Poirei Angamba (Shillong Lajong FC).

Defenders: Pritam Kotal, Vishal Kumar, Souvik Ghosh, Prathamesh Maulinkar, Deepak Devrani (all from Pailan Arrows), Narayan Das, (Tata Football Academy),  Abhishek Das (Kingfisher East Bengal).

Midfielders: Pronoy Halder, Ognam Milan Singh, Thirthankar Sarkar, Alwyn George, (all from Pailan Arrows), Simranjit Singh (Tata Football Academy), Ganeshan (Pune FC), Deepak Prakash (HAL), Lalrindika Ralte (Churchill Brothers), Shyju Mon (Chirag Kerala), Romeo Fernandes (Dempo FC).

Forwards: Holicharan Narzary (Pailan Arrows), Jeje Lalpekhlua (Pune FC), Manandeep Singh (Air India).

Captain :  Jeje Lalpekhlua (Pune FC)

Vice Captain : Gurpreet Singh Sandhu (East Bengal)

Head Coach: Arthur Papas